Ka International Day against Drug Abuse and Illicit Trafficking da leh warom ya ka ynne ha East Jaiñtia Hills District hajrong ka phang “People First: Stop Stigma and Discrimination, Strengthen Prevention”. Ya ka yalang da pynman da ka yung krehkaam ka District Social Welfare Officer, East Jaiñtia Hills District ha Community Hall ka chnong Umkiang.
Ha kani ka sngi da emlang ka District Social Welfare Officer, ka R. Passah, u S. Buam uwa man u Sub- Inspector In-charge ka Umkiang Police Patrol Post, u L. Syiem, Sub-Inspector, Ratacherra Check Post, ka R. Patlong kawa man ka Programme Manager yong ka Mihmyntdu Community Social Welfare Association (MCSWA), ki khynnah skur wa kiwi kiwi.
Hawa e yei klam, ka R. Passah da khana ko chaphang ka Nasha Mukt Bharat Abhiyaan kawa da sdang ha u 2020 wow yakhun pychah ya i pynemkaam drugs ha ka ri. Da ban joor ko wa waroh kiwa em ha ka imlang sahlang u kreh chirup waka Social Welfare Department, Police Department wa kiwi ki chnat sorkar wow yakhun pyrchah ya u drugs hapoh ka District. Da ong ko wa kam kiwa chong chnong emkaam u em i kitkhlieh wow leh pyrchah yei pynemkaam drugs khnang wow lait noh nei drugs.
U S. Buam, Sub-Inspector In-charge ka Umkiang Police Patrol Post da e u yei klam yow pynsñiawthooh kiwon ki drugs wa man pyrchah ya ka aiñ wei kiwon kiwa chah wow dih deiwa e dawai ki Doctor.
Kiwa man pyrchah ya ka aiñ toh i Heroin, Opium, Ganja, Cocaine wa kiwi kiwa da khang wow pynemkaam hapoh ka aiñ Narcotic Drugs and Psychotropic Substances Act (NDPS) Act 1985. Kamtæ da kyntu u ya ki paidbah wow pyntip cha ki pulit lada tip ki ya kiwa pynemkaam ya ini i drugs lane kiwa khayi drugs deiwa Phone ha ki Helpline Number 100 wa 112.
Neiliang ka R. Patlong hawa e ya i klam hajrong ka phang yong kani ka sngi da ban joor ko wa emkaam u yarap ya ki bru kiwa pynemkaam drugs khnang yow ye ki u jop yow chlur ki leh u lai chah sumaar. Kamjooh leh da ban ko wa emkaam u pynman ya ki pynsñiawthooh paidbah kammon ktah u drugs ya ka imlang sahlang. Da kyntu ko leh ya waroh wow yait na u drugs, i kiad, i dih duma wa kiwi kiwi ki mar wa ktah yei doh i pran ki bru.
Ha kani ka sngi da saam leh ya ki khusnaam cha kiwa jop ha ki yakob waphær waphær wei da pynyooo leh ya ka phlim wa tbian wa pyrtuid “Behind Closed Door,” kawa pynyoo kammon ktah u drugs ya ki bru.
