Ya ka sngikha u Deen Dayal Upadhyay da leh warom ha Wahiajer ynnin ka sngi deiwa emlang u Prof. Dr. H. Lamin uwa man leh u Principal yong ka Deen Dayal Upadhyay Community College for Skill Development Wahiajer, West Jaiñtia Hills District.
Kani ka Deen Dayal Upadhyay Community College kawa man ka chnat yong ka skurbah NEHU da sdang ha Wahiajer ha ka 25-05-17 ha i thaw wa e sñiawbha da ka Dorbar Chong Wahiajer.
Kam chibynta ini i leh warom da pynman leh yei yakob thoh Essay, yakob dro dur, ka yaphet Marathon, ka yalehbol wa kiwi kiwi de.
Da pynman leh ya ka yalang wa tbian ha madan Stadium ka Wahiajer wada pynlai da u Prof. Dr. Henry Lamin deiwa emlang u Waheh Chnong ka Wahiajer, u Sanwotki Laloo uwa da e leh ya ki kyntien pdiang sñiawbha wei da yoh leh yei klam na u W. Lyngdoh uwa man kam uwi na ki waheh ka chnong Wahiajer heijooh i por leh uwa man u Additional Director of Education warim yong ka sorkar Meghalaya.
Da yoh leh i klam na u J.W. Dkhar, Associate Professor NEHU, na u LMK Lyngrah uwa man u Finance Officer, NEHU Shillong heijooh por kam u symbood kongsan ha kani sngi wei da yoh leh ia i klam na u kongsan, u SK Dixit, Registrar NEHU Shillong uwa da yaroh ya u Deen Dayal Upadhyay uwa man u bru uwa chynna jngai ya ka mynried ki khon kynroo khyllood heiwa da kyntu u leh ya kiwa lai puræ kani ka College wow man ki kiwa khreh chitom khamtam kiwa puræ ha kani ka Skill Development College kawa em ha ka chnong Wahiajer wa ym toh u sarom lada khreh ya iwon iwon i kaam, da ong u leh wa ha kini ki sngi da man ko iwa eh u yoh khreh sorkar kamtæ da kyntu u ya ki khynnah wa lai puræ ki ha kani ka Deen Dayal Upadhyay Community College kawa man leh chibynta u ye u seiñ khih yow yieñ ha ki kjat yong ki hi.
Da pynkut da ki kyntien e khublei na u Wolnish Rymbai uwa man kam u Coordinator yong kani ka Deen Dayal Upadhyay Community College Wahiajer.
