Ka sorkar pyrdi ha u 2021 da pynbna ko ya ka 15 tarik u Khonchonglad (Nov) kam ka Jan Janjatiya Gaurav Divas yow kynmoo wei wow leh warom ya ki khlawait ki jaitbru ri-loom kiwa da yaleh wow yoh laitlooid ka ri.
Ini man ko leh kam chibynta wow lehkmen yei dap 75 snem i yoh laitlooid ka ri wei ka 15 tarik man ko leh ka sngikha u Birsa Munda, u khlawait ka jaitbru Munda uwa da yahkhmat yei yaleh pyrchah ya ki pharæng ha Bengal Presidency kawa haap katni ha jylla Jharkhand.
Kamtæ ha Meghalaya da lehwarom ya kani ka sngi deiwa pynam yei lai paidbah deiwa pynyoo rong ya ka dustur riti deiwa kynmoo warom ya ki khlawait ka jylla heiwa da pynman ya ki Skit wa kiwi de.
Daw pynman leh ya ka Seminar hajrong ki parom yongrim ha Wakhen Music Village ha kani ka tayaw wow lehkmen ya ka Jan Jatiya Gaurav Divas.
