Ka yung krehkaam u Senior Dairy Officer, West Jaiñtia Hills da lehkmen ko ya ka sngi wa kyrpang neibynta i dud kawa tip kam ka National Milk Day ha pchem ka Jowai Dairy Plant, Mooralong heiwa u MLA ka Jowai u Wailadmiki Shylla da wan u kam u kongsan.
Hawa klam yei emkaam wa i myntoi nei dih dud wa yoh u bru, u Wailad da ong u wa najrong wa i dud yarap i deiwa dih, ye leh u chna ya iwa boon jait nei dud kiwa man leh kam ki laad kamai. Da pynchlur u leh ya ki warep yei emkaam wow ri rap boon ki masi yow ye u pynmih chiboon i dud heijooh i por leh da yaroh u ya kiwa ri masi wa ye ki wow pynmih yei dud wa bha wa miat deiwa khut leh wow ya krehlang neibynta i bha i mait yow pyn-neh yei yoh nong na ini i khih.
Da pyntip u wa ka sorkar leh da sdang ko ya ka Milk Mission wei lyngba kani ka Mission da e ram cha ki warep kamtæ u MLA da pynchlur u ya ki warep wow pynemkaam ya ini yow yoh myntoi ki.
U P.K. Boro, Additional Deputy Commissioner, Jowai hawa e yei klam wa tbian da pynchlur wei kyrpaad u ya kitu kiwa seiñ khih dei yong ki hi wow chimkhia wow pynmih chiboon i dud neibhah i dud da man i iwa emkaam bha katni. Da ban joor u leh yei emkaam wow yoh yei stat kammon wow pynmih dud.
U Dr. I. Kjam, District Animal Husbandry & Veterinary, Jowai da khana u wa ya kani ka sngi man-u-snem da kynmoo ya ka kam chibynta ka sngikha u Dr. Varghese Kurien uwa tip kam u Father of the White Revolution uwa da pynkylla yei pynemkaam yei dud wei ha uni snem da man ko leh ka lyngkhooh dap 100 snem u Dr. Varghese.
Da pyntip u leh wa kani sngi man ko leh kam chibynta wow lehkmen yei emkaam i dud wa ki marbaam wa chna na i dud. Da pynchlur u leh ya ki warep wow chim yei ri masi kam kawi ka laad wow pynboon yei yoh nong ki.
Da klam u leh chaphang i chait i khiah wa i yatoh hapyrdi ki bru wa ki mrad.
Ha kani ka sngi da pynkup burom da ki Certificate of Motivation cha ki arngut ki warep u Dabana Challam, Kumkyndong, PMPCS (Primary Milk Producer Co-operative Societies) wa u Duhniaw Wanmi Lyngdoh, Kyrwem PMPCS wa pyndap pynbiang dud ki cha ka Jowai Dairy Plant.
Ka yung krehkaam da saam ko leh ya ki Certificate of Appreciation cha waroh ki bru kiwa pynpoi mar wot heipor wa em ka khlam COVID-19.
Da saam Certificate leh cha ki khynnah skur kiwa jop ha ka yakob toh Essay wa i dro dur.
Hachwa ini da yoh ya ki kyntein pdiang sñiawbha u B. Dkhar, Senior Dairy Officer, West Jaiñtia Hills District, Jowai wa ki kyntien e khublei na u E.C. Pyngrope, Dairy Officer (Extension) RDEC, Jowai Dairy Plant.
