Ynne ka sngi kawa man leh ka sngi kyrpang kiwa da heh rta kawa tip leh kam ka International Day of Older Persons da lehkmen ya ka da ka yung krehkaam ka District Social Welfare Officer, Khliehriat hajrong ka phang “Digital Equity for All Ages” ha ka yalang wa pynman ha chnong Iapmala wa Samasi.
Ha kani ka sngi da emlang u MDC la thaaiñ u Dr. S. Shangpung, uwa man leh kam u Chairman, JHADC deilang wa kiwi de kam Dr. C. Sariang, Medical Health Officer, ka H. Pale, Lawyer, ka R. Passah, District Social Welfare Officer, u waheh chnong ka Iapmala, Lumskhen wa Wahsariang.
Hawa e yei klam, u Dr. S. Shangpung da pynkynmoo u ya ki kaam wa kiwa da heh rta wa da leh ki neibynta ka imlang sahlang.
Ka R. Passah, DSWO da ong ko wa ka yung krehkaam ka District Social Welfare Office toh kawa pait yei bha i miat kiwa da heh rta wei da khana ko leh ya ki Scheme wa kiwi de ki yarap neibynta kiwa da heh rta kam i yarap sumaar, ki CM Scheme kiwa neibynta kiwa da heh rta.
Ha chnong Samasi da lehkmen ya kani ka sngi deiwa emlang leh u Dr. S. Shangpung (MDC), Dr. L. Sutnga, Medical Health Officer, ka H. Pale, Lawyer, ka R. Passah, District Social Welfare Officer deilang wa ki waheh chnong ka Mookhain, Samasi wa Myntlu.
