Kam chibynta u pynpsiah hei thij i pyrkhat ki paidbah hajrong i kordor ka um, kamjooh leh kammon u kune yaka, ynne ka sngi neiliang ka yung krehkaam yong ka District Water and Sanitation Mission, West Jaiñtia Hills District, da pynman ko dei lai Rally da ki thuk-thuk wada sdang na yung krehkaam ka PHE, Jowai ter ter u surokbah chadooh chnong Ialong wei da uiñ pynkut won ha Community Hall ka Dorbar Chnong Mynthong, Jowai.
Kani ka sngi man ko leh ka sngi kynmoo warom yaka sngi kyrpang yong ka um ha kylleiñ ka pyrthai kawa tip kam ka World Water Day hajrong ka phang “Accelerating Change”.
Haka yalang ha Mynthong wada emlang ki khynnah skur, kiwa sikai, kiwa yahkhmat chnong waphær waphær ka District wa kiwi de, u Deputy Commissioner ka West Jaiñtia Hills District, u B.S. Sohliya da man u kam u kongsan.
Hadien wada yoh i klam yahkhmat naka R. Kynjing, Executive Engineer PHE RWS Division Jowai, Cum Member Secretary DWSM, u R. Challam, SDO Electrical Division Jowai da batai pynsñiawthooh u hajrong ka phang “Be the change you want to see in the world”, deiwa kyntu leh u sumaar u e yada yaka um najrong wa klam u heiyatoh i emkam i khooid i suba wei wow pynduna i pynemkaam Plastic.
Neiliang u kongsan, u B.S. Sohliya hawa klam, da kyntu u wymtoh u lehbeiñ yaka rymaw neibhah ka um mih ko naka rymaw wei waroh kiwa im haka pyrthai wym ye ki u im khlem ka um.
Da pynkynmoo u wa nachwa ki bru tong wei dih bait ki kamtu ya ka um na khloo leh wei ym em hi phær iyi iyi, katni won da emkaam u pynkhooid chwa, wei ye u man neidaw wa ka rymaw wym jooh bor de ko u pynkhooid pyn da ka hi wada joor i pyntngit ware ki bru.
Hawa booh kyntu, ong u i por da toh u chim kitkhlieh neibynta u thooh ki laad ki luti deiwa sdang na samen. Wei yooluti u leh wa haki snem wow wan wot ki skur kamjooh ki bru samen u pynyoo ki yei luti wa jop wada leh ki heiyatoh u pynneh pynsah ya ki um ki wah wym du neiliang ka chnat PHE.
Ha kani ka sngi da em leh ki skur wa pynyoo yaki buit hajrong kammon u yada pynneh pynsah yaka um, wei da yoh leh i rwai naki kynhun wa jop haka yakob rwai tynre wa pynman da kani ka chnat krehkaam ha ki kajiak sngi.
