Jowai: Ka sngi wa kyrpang ki kynthai namo ka Women’s International Day kawa lehkmen ha man ka 8 tarik uni u bnai da lehkmen yaka ynne ka sngi ha Jowai neidaw wa ka 8 tarik haap ko haka sngi Bibar ha uni u snem. Ya kani ka lehkmen da pynman daka yung krehkaam ka District Social Welfare, West Jaintia Hills haka District Library Auditorium, Mynthong, Jowai hajrong ka phang, “I am Generation Equality, Realizing Women’s Right”.
Ka T .Phanbuh, Chairperson Meghalaya State Commissioner for Women da embynta lang ko kam ka kongsan. Da emlang u West Jaiñtia Hills Superintendent of Police u Lakador Syiem, MPS, ka Thadlaskein BDO ka B. Blah, MCS, ka DSP ka C. Lyngdoh, u H.H. Mohrmen, ki dkhot ka Meghalaya State Commission for Women wa kiwa mihkhmat kynthai na kiwa boon ki dong ki chnong ka District.
Ka T. Phanbuh hawa e yei klam, da khut ko ya waroh ki kynthai wow yieñ ki pyrchah yei chah lehbeiñ ki kynthai ha ki manyung kamjooh ki thaw kreh wei wow yarap u leh ya ini khamtam ya kitu wa ym em i stat i tip.
U SP Lakador Syiem da klam u yaka yukit ki kynthai kam ki manbei wa yeiwa da noh lut ki wa I bynta wa emkaam wa em ki ym du haka yung ka sem kamjooh haka imlang sahlang. Da yaroh u leh yei kreh chitom ki pulit kynthai ka Police Department kiwa da ryngkat wa ki chyrang hei kreh yong ki. Da e khublei u leh ya ki Seiñ Manbei, ki sahep ka Social Welfare, Child Protection kiwa da e yei kti tidiang wa timun wow yarap ya ki pulit khamtam ha kini ki sngi wa da dep wei da khut u leh yaki wow pteiñ ya ini i ya krehlang.
Ka BDO B. Blah waka DSP ka C. Lyngdoh da ban joor ki yei emkaam u em i yaryngkat hei manbru wei i pynkupbor yaki kynthai. U yaleh wow yoh ya ini i hok wei wow em i stat yow yoh ya ini waroh.
Ha kani ka sngi da pynkup broom leh yaka Wanmon Tang, ka Selmin Lyngdoh waka Trinity Saioo ya ki kaam wa bha wa da ye ki u leh.
Da em leh ka lehke drama wa tbian wa leh da kiwa puræ BSW ka Womens College, Shillong hajrong ka phang kani ka sngi.
Yaka yalang da pynlai daka K. Lamar, Member Meghalaya State Commission for women.
Ka J. Synnah, District Social Welfare Officer da e ko yei ktieñ pdiang sñiawbha katwa ya ki ktien e khublei da yoh naka R. Bareh, Child Development Protection Officer ICDS, Thadlaskein BLock, West Jaiñtia Hills.
Discussion about this post