Ki bor District ka West Jaiñtia Hills da lehkmen ki yei dap 49 snem ka jylla namo ka Meghalaya Day ha Conference Room u DC ha Jowai heiwa da pynman leh yaka ngooh Blai deilang wa ki niam waphær waphær heiwa yaka yalang da chongknor da u Deputy Commissioner LNS Dykes, IAS.
Ya kani ka yalang da sdang deiwa puræ yaka Bible da u M.A Challam, MCS, Extra Assistant Commissioner, Jowai.
Ha ki duwai Blai da paan yei suk, i saaiñ kamjooh yow yada na ka khlam wa ha ki bor ka rymaw wei wow pynku wei wow kynrong ya waroh ha waroh i liang. Da duwai leh neibynta kiwa yahkhmat ka jylla, kiwa yahkhmat niam. Ya ki Doctor, ki Nurse wa waroh kiwa em hakhmat dooh wow yaleh pyrchah yaka khlam COVID-19. Ya kiwa chiyung chisem, ki khon ki kti, ki khynnah wa kiwa chong chnong ka jylla wow ku wow heh u san ki ha ki kaam puræ puthi, ka rep ka riang wa kiwi de ki kaam pynroi.
Neibynta ki khynroo khyllood kiwa man ki mynried ka imlang ka sahlang waka jylla waroh kawi da paan yei yada yaki kmjooh wow yoh bor u kiar na ki kaam wa sih ka juk wa katni heiwa duna i yoh kaam yoh jaam yow yoh ki leh yei stat i chemphang wow jied ya iwa toh hawa im ki.
Ya i ngooh Blai da yoh na u Executive Secretary, KJP Synnod Mihngi, Jowai, u Rev. HCT Sumer, Parish Priest Catholic Church Jowai, u Rev. Fr. Hilarious Lamare, u Moderator KJP Synnod Mihngi u Rev. S. Lamare, u Dolloi Elaka Jowai u Puramon Kynjing, u Pastor In-charge Unitarian Church, Jowai u Rev. H.H Mohrmen wa na u Dean ka Khasi-Jaintia Deannary, Church of North India, Jowai u Rev. Shenphang Siangshai.
