Ka Global Iodine Deficiency Disorders Prevention Day da lehwarom ya ka ha Khliehriat CHC, East Jaiñtia Hills District wei ya kani ka lehwarom da pynman da ka yung krehkaam District Medical and Health Officer, East Jaiñtia Hills District.
U S.S Syiemlieh, uwa man kam uAddl. Deputy Commissioner, ka District da man u kam u kongsan hei emlang u Dr. Dominic Shylla, District Medical and Health Officer, ka Dr. Handaka. L. Suting, DEIC Manager, wa kiwi kiwi.
Ya kani ka lehwarom da pynman hajrong ka thong wow pynsñiawthooh yei emkaam u baam ya ki baam wa em Iodine wei i myntoi kamjooh leh i ktah hawa duna Iodine.
U S.S. Syiemlieh, hawa e yei klam da yaroh u yei kreh chitom ki ASHA deiwa ong leh wa ki manbei manpa wa ki ASHA em ki ka bynta wa khroo ha ka imlang sahlang khamtam ha i chait i khiah ki khynnah.
Da klam u leh yei myntoi i chait i khiah wa ki program e dawai ka sorkar heiyatoh wa i chait i khiah ki bru waroh.
Chooh chooh da ong u wa i duna Iodine ha ki khynnah ktah i yei bor pyrkhat wa i heh ki khynnah deiwa kyntu ya ki ASHA wa ki manbei manpa wow kreh ki chirup neibynta ini. Da kyntu u leh ya kiwa em ha kani ka sngi wow rah ki ya ka wyrta yei emkaam ki baam wa em iodine ha i doh i pran ki bru.
Neiliang u Dr. Henry RM Lamare, M&HO (Pediatrics) 100 Bedded Hospital, Khliehriat da khana u hajrong ka Global Iodine Deficiency Disorders Prevention Day wa ki kjut wa yoh ki bru neidaw i duna Iodine.
Kiwi kiwa da klam ha kani ka sngi toh ka Dr. (Mrs) N.P Suchiang, M&HO, I/C Khliehriat CHC kawa da e ya ki kyntien pdiang burom, u Ariston Dhar, DPM, NHM, East Jaiñtia Hills District, ka Daphihi Passah, Adolescent Health Counsellor, NHM, Khliehriat katwa ka Dr. (Mrs) E. L. Kharmutee, DIO, I/C, East Jaintia Hills District da e ko ya ki kyntien ekhublei.
