Jowai: Ynne ka sngi da lehwarom ya ka 70th Republic Day ha madan Jrisalein heiwa u montri ka chnat puræ puthi u Lahkmen Rymbui da pynhær u ya ka lama ka ri wei hawa e yei klam da pynkynmoo u ya kiwa da yakhun wow yoh laitlooid ka ri deiwa kyntu ya ki paidbah wow wanrah ki yei chongsuk chongsaiñ hapoh ka ri.
Da em leh ka Parade kawa chimbynta da ki 24 tylli ki dhab nadooh ka District Police Jowai, District Home Guard, NCC wa ki 21 tylli ki skur.
Ha ka parade ka H.K. Singh Memorial School da man ko kawa jop ya kawa da ynbood won sa ka North Liberty Higher Secondary School wa ka St. Mary’s Mazzarello Higher Secondary School.
Da pynyoo leh ya ki Tableaus namo ki kari wa da pynriam ha rukom kiwa klam hajrong ki kaam ki chnat sorkar wei da rai jop chwa ya ka District Agriculture Officer, wei da pynbood won da ka Sericulture office wa ka District A. H& Veterinary Office.
Da e leh ya ka song poisa wa T. 2 lak cha ka Nartiang PHC wa T. 50,000 cha ka Shangpung PHC hapoh ka Kayaklap kawa man ka thong krehkaam ka Ministry of Health and Family Welfare Government of India wow wanrah yei khooid i jngiar hapoh ki thaw sumaar sorkar.
Da pynkup burom leh ya ki bru samen kiwa da pynjop ya ka Measles Rubella Campaigns kawa sdang ha ka 24 Naikhynde, 2018 ha West Jaintia Hills District heiwa da yoh wow e dawai hadooh 96%.
Kini ki bru samen toh u Richard Uriah, Principal ka North Liberty Higher Secondary School, u Wanbok Sutnga u waheh chnong ka Khlieh Rangnah, u Father A. Ashihe Parish Priest ka Syiem Jingsuk, Amlarem, ka Matilda Biam kawa sikai ha Hubert Memorial School, Thadialong, Nartiang, u Tonroy Ionglwai, waheh chnong ka Nangbah wa u Konel R. Phira wa man kam u Brand Ambassador ka MR Campaign.
Da pynphooh ya kani ka lehkmen da ki rwai ki chaad wa i saam baam cha ka Dr. Norman Tunnel Hospital, Civil Hospital wa kiwa chah kset ha District Jail, West Jaiñtia Hills District, Jowai.
Discussion about this post