Ka 25 tarik uni u bnai man ko ka sngi wa da pynemwarom ya ka Pharmacists Day ha chityllup ka pyrthai kawa tip kam ka World Pharmacists Day namo ka sngi wa kyrpang yong ki Pharmacist kawa man leh ka sngi lyngkhooh dap snem yong i chem ya ka International Pharmaceutical Federation ha u 1912 wei ya kani ka sngi da pynemwarom man-u-snem nadooh u 2009.
Ha West Jaiñtia Hills da pynemwarom ha Highwinds Lakeside Hotel, kawa da pynman da ka Meghalaya Government Pharmacists Association, Jaiñtia Hills Unit, hei yahkhmat yong u Solvinson Pohrmen kam u President wa u Ladwan Dkhar kam u General Secretary.
Ha kani ka sngi, u Dr. E. War da man u kam u kongsan uwa man leh u Medical Superintendent yong ka 100 Bedded MCH Hospital, Jowai.
Hei klam kam u kongsan, u Dr. War da ong u wa ki Pharmacist ymtoh de kam kiwa kreh napoh pyrda tangwa kam kiwa hakhmat namo ki Frontline yong ka rukom e sumaar namo ka Health Care System, da ong u leh toh u man kiwa ye u pdiang næ lai lang wa i kylla kamwa yah i por, neibhah ha kiwa kreh kiwa da rap heh i rta ym ye de ki u pdiang, kamtæ kyntu u wa emkaam u lai lang wa i kylla kam wa yah i por ka pyrthai thymme ka pyrthai Technology, da ban joor haroh wa i Counselling namo i sneiñ ya kiwa kjut toh iwa emkaam hadooh kattæ iwa ki Pharmacist ye ki u leh khnang yow ye u pynkhlan ya i krehkaam yong ka chnat i chait i khiah, deiwa pynemkaam hok ki ya ki dawai katkam i batai pynsñiawthooh na ki Pharmacists.
Ha kani ka sngi u Iarap T. Toi, Assistant Drug Controller, Government of Meghalaya, uwa man kam u Guest Speaker, da klam e bor e mynsien u ya waroh ki Pharmacist wei da pynkynmoo u leh ya i kaamram i yong ki Pharmacists wym hoi u ran ki chadien toh u nangtia ki chaphrang hei wow pyntoh pynbiang ya ki dawai kiwa bha neibynta yong kiwa kjut ha i por wa biang wa i thaw wa biang.
Ya kani ka yachem da pynlai da u Cheristar R Passi, Vice President MGPA (Jaiñtia Hills Unit), da yoh i pdiang burom da u Solvinson Pohrmen, President MGPA (Jaiñtia Hills Unit), i klam hajrong ka phang Role of Pharmacist da u Hamlen Rymbai, Pharmacist Rymbai PHC wa ki kyntien khublei na u Ladwan Dkhar, General Secretary, MGPA.
Ha kani ka sngi da pynphooh pynphieñ da i chaad tynre na ka Shlem Riti Tynre, Jowai wa i rwai ‘World Pharmacist’ Day na u Khanalang Sumer.
Discussion about this post