Jowai: Ka yungkrehkaam ka tnat Social Welfare ka West Jaiñtia Hills ynne ka sngi da leh burom ko ya kiwa chong chnong kiwa da em 65 snem chaneiñ i rta kam chibynta ka International Day of Older Persons.
Ha kani ka sngi da pynkupburom nyngkong ya u Woh Shaimon Pyrbot uwa da em 101 i snem da u Dr. R.C. Laloo, Deputy Chief Minister wei da e leh ya oo ya ka song poisa T. 10,000.
Ha kani ka yalang u S.K. Lato da ong u wa ka riti dustur yong i hi toh kawa pait wa sumaar ya kiwa da heh rta hanlada man ko ka kitkhlieh wa heh wa kawa eh. Da ong u leh ym em chah ieh beiñ ki kam cha kiwi ki ri heiwa manda tymmen ki libooh wot ki cha ki yung ri tymmen.
Da pynkynmoo u leh wa emkaam u uiñ cha wa wah cha neiñ yow yoh ya i chait i khiah, u baam da ki baam wow pynkhlan ya i doh i pran kamjooh wow man kiwa leh khooid.
U DC ka District u R. Rapthap da ong u wa oo sñiawsuk u pynlut por heipor wa dang khian wa kiwa da tymmen neibhah sñiawsuk u ap ya ki parom yong ki kamjooh yei sneiñ yong ki.
U Kongsan ha kani ka sngi da ong u wa sñiawsuk u wow emlang ha kani ka yalang neibhah boon ki khmat wa yoo u toh du kiwa tipmit u ymtoh kam cha kiwi ki yalang wa boon kiwa dang khynroo.
Da ong u leh wa heipor wa chong ngiah ym em mut wa da kut ki kaam ki jaam wa ye u leh, neibhah kattu pathan da yoh boon i por yow leh ya iwa kwah u leh kamtæ da man ko kam ka rukom im wa thymme.
Ha chwa u kut ka yalang da saam poisa leh cha waroh kiwa da khut sñiawbha ka tnat Social Welfare.
Discussion about this post