Jowai: Ka 14 tarik u Khonchonglad toh ka sngikha yong u Pandit Jawarhalal Nehru, u Prime Minister wa nyngkong yong ka Ri India kamtæ kamwa man ha kiwi ki thaw, hapoh ka chnong Jowai leh da sakhi wa ya kani ka sngi da leh warom da kiwa sikai ka North Liberty Hr. Secondary School deiwa pynman ka program lehke pynwyrngia pynkmen pynka-it ya ki khynnah ka skur.
Ya kani ka program da pynlai da ka Suchen Malngiang heiwa da kdar luti dei puræ ya ki kyntien kyrpang na ka Bible da u Evan Warjri, ki kyntien kyrpang heiyatoh wa kani ka sngi da klam da pynsñiaw da u Principal, u Richard B Uriah, ki kyntien khublei da e da ka Matti Kharbudon wei pynkut won ya kani ka program da ki kyntien duwai na u Comping Kharngi.
U Richard hawa e kyntien heiyatoh wa kani ka sngi da ong u i daw wa pynman ya i wow yachemlang kamni toh wa sñiaw i phi toh kiwa kyrpang wei da ong u leh kam ki khynnah kynmoo em phi ka bynta wa khroo hei wow leh yei wabha tam neibynta ka yung ka sem wa ka imlang sahlang. Chooh chooh da kyrsu kyntu u leh ya kiwa sikai wow yaleh ki katwa ye walah wow e yei maya wei man kiwa yaichah hei wow saiñdur saiñdar ya i long wei man ki khynnah.
Da sakhi sakhiat ya kani ka sngi kyrpang ki khynnah ha North Liberty Higher Secondary School heiwa da chem wa man sakhiat ko ka sngi kawa yoh ki khynnah yei kmen wei ka-it mynsien heiwa kiwa sikai nadooh ki chynrang hadooh ki kynthai da chimbynta ki wow pynwyrngia pyndanda ya ki khynnah da ki rukom lehke wa boonjait kam ki chaad, ki rwai wa kiwi kiwi.
Discussion about this post