Ka International Day of Persons with Disabilities da lehwarom ya ka ynne ka sngi ha Holy Trinity School, Sutnga Pdengshnong, East Jaiñtia Hills District hapoh ka phang “Leadership and participation of persons with disabilities towards an inclusive, accessible and sustainable post –Covid-19 World”.
Ya kani ka yalang da pynman da ka yung krehkaam ka District Social Welfare Officer, East Jaiñtia Hills District heiwa da embynta ka R. Passah, District Social Welfare Officer, ka M. War, kawa man ka muktiar ka DLSA, Khliehriat, u W. M. Bamon, Manager, DRCDA, Jowai, u S. Phawa, Secretary, EPHPHATHA Society wa u E. Sapuh, President, EPHPHATHA Society.
Ka R. Passah da ong ko wa ya kani ka sngi da lehwarom ha kylleiñ ka pyrthai wow pynsñiawthooh ya i hok ki bru wa tymbuiñ duna.
Da ong ko leh wa ka yung krehkaam Social Welfare ha ka District man ko kawa pait ya ki bru wa tymbuiñ duna deiwa e kyrchaan ya ki lyngba ki wakreh ka chnat heiwa daw yarap kammon wow yoh ya ka UDID/Disability Certificate.
Ka M. War, da batai ko hajrong ka aiñ Rights of Persons with Disabilities Act, (RPwD) Act, heiwa da ong ko wa kani ka aiñ pynkupbor ko ya kini ki bru wow man salonsar ki kam kiwi tawon. Da pyntip ko leh wa da thung ya ki Special Public Prosecutor wow yasait aiñ neibynta ki bru wa tymbuiñ duna.
Ha kani ka sngi da pynman leh ya ka Free Medical Health Check-up da ka yung krehkaam District Medical and Health Officer, East Jaiñtia Hills District wei da pynman leh ya ki yakob kam ki rwai, ki yalehke Sports wa kiwi kiwi.
