Jowai: Ka yung krehkaam ka District Social Welfare Officer, West Jaiñtia Hills District, Jowai, da lehkmen ki ya ka International Day for Persons with Disabilities ynne ka sngi ha Recreation Centre, Nongtalang, kawa em hapoh ka Amlarem Sub-Division hajrong ka phang “Empowering Persons with disabilities and ensuring inclusive and equality” heiwa u Lahkmen Rymbui, u montri ka chnat puræ puthi ka jylla da emlang u kam u kongsan.
U Lahkmen hei klam yong oo da ong u wa ynne ka sngi man ko ka sngi wow kynmoo ya kitu kiwa em i duna hei doh i pran yow pynsñiawthooh wa ki leh man ki ki dkhot ka imlang sahlang em ki ka bynta yong ki wei waroh hi ki bru em ki jar jiar i duna iwa ym em mut wa duna ki bynta i doh i pran kiwa ym em i kjut i sam wei lada u bru wa chait wa khiah tangwa man u uwa swepap da man u u bru wa khlemkaam.
Kamtæ da pynchlur u ya ki bei ki pa ki khynnah wa em ki khon wa duna ha iwon iwon i liang wa ymtoh u dooh kyrmen ki wei wow pynlut por ki wow pynchlur wei wow e bor ya ki wa ki sap wa em ha ki yow ye ki u im lang wa kiwi. Chooh chooh da ong u wa kam ka imlang sahlang emkaam i wow burom wei ymtoh u yoobeiñ ya kiwa em i duna yow ki u im deiwa em burom.
Ka District Social Welfare Officer ka J. Synnah ha ki ktien waiphang yong ka da ong ko wa ya kani ka sngi da kynmoo burom man u snem ha ka 3 tarik Kmaichonglaad yow pynsñiawthooh yei hok yong ki bru wa em i duna hei doh i pran. Da pyntip ko leh chaphang ki Scheme wa ki Scholarship wa e ya kiwa lai puræ nadooh Nursery hadooh wa pyndep BA wei ya ki Form Scholarship u saam nadooh u bnai Naitung (April) – Naisan (May) wei ye u yoh ya ki na yungkrehkaam Social Welfare Office, Jowai deiwa rah lang wa ka Disability Certificate.
Da yoh leh yei klam na ka Dr. S. Tariang, Nongtalang CHC ha kani ka sngi.
Ha chwa ini da pynman leh ya ka Medical Checkup wa ki yakob wa boonjait wei da saam leh ya ki khusnaam cha kiwa jop.
Ya ka yalang ynne ka sngi da pynlai da u M. Lyngdoh u waheh chnong ka Nongtalang.
Discussion about this post