Ynne ka sngi da pynman ya ka phyllu yumut hajrong ka phang ‘A talk on the SDG Programme & the 2030 Agenda of the United Nations’ kam chibynta yong ka United Nations Day wei ya ini da pynman ha Conference Hall ka yung krehkaam u Deputy Commissioner ka West Jaiñtia Hills.
Kani ka phyllu yumut da pynman leh kam chibynta yong ka ‘Pan India Awareness & Outreach’ yong ka Azadi ka Amrit Mahotsav wa i lehwarom ka Legal Services Week wei ya kani da pynman da ka District Legal Services Authority (DLSA) chirup wa ka District Administration.
Ya kani ka yalang da pynlai da ka RM Kharsyntiew kawa man kam ka Chief Judicial Magistrate-Cum-Secretary DLSA wei da e ko leh ya ki kyntien pdiang burom.
Da yoh ya ka Power Point Presentation na ka Hessed Thabah wa u Arijeet Debnath kiwa man kam ki Consultant ka Planning Department.
U AS Mukhim uwa man kam u Additional Deputy Commissioner hawa e yei klam da ong u wa kam kiwa kreh sorkar emkaam wow pyntikna wow pynkreh hok ya ki Scheme khnang wow ye u pynman ya ka ri kawa kylla kam kiwi tawon.
Da ong u wa ki sahep sorkar toh u kreh ki katkam ki thong wa da booh da ki chnat yong ki khnang wa ha ki snem wow wan daw man ki thong kiwa jop.
Kiwi wa da klam ha kani ka sngi toh ka DD Syngngai, ADC wei ki kyntien khublei na ka Sunita M. Sayoo kawa man ka Muktiar ka Jowai Bar Association.
