Ka World Heart Day Cum Adolescent Health Day da lehwarom ya ka ynne ka sngi ha Dkhiah West Community Hall, East Jaiñtia Hills District Khliehriat heiwa ya kani ka lehwarom da pynman da ka yung krehkaam District Medical and Health Officer hajrong ka phang “Use Heart to Connect”.
Neiliang u Dr. D. Nongpluh, M&HO, 100 Bedded Hospital, Khliehriat da khana u ya ki kaam wa ye u yoh Heart Attack næ Stroke wa kynthup ya ka kjut BP, Klongsnaam, Chini, Dih Kiad, Dih Duma (Blood Pressure, Cardiovascular Disease, Diabetes, Alcohol Consumption and Smoking) wa kiwi kiwi.
Da ban joor u hajrong i emkaam wow leh Medical Check Up dei langær, wow tip ya ka Body Mass Index (BMI) deiwa thaw khia wa i jrong. Da kyntu u leh ya ki khynnah wow syndong ya i chait i khiah deiwa baam ya ki baam wa tei, wow thiah bha, wow pynjra doh, wow kiar na ki baam wa ym miat ya i doh i pran.
Neiliang u L. Lyngkhoi, Circle Inspector (S) Khliehriat, da batai u hajrong ka aiñ Protection of Child from Sexual Offence (POCSO) Act 2012 wa ka Juvenile Justice (Care and Protection of Children) Act 2015.
Ha kani ka sngi da em ka Extempore Speech hajrong ka phang World Heart Day kawa chimbynta da ki khynnah ka Little Star Secondary School, Ieng Swer Memorial Secondary School, Dkhiah Presbyterian Secondary School wa Khatsoo Ri Pnar Brightstar Secondary School.
Kiwi kiwa da klam ha kani ka sngi toh u C. Tlang, Waheh Chnong ka Dkhiah West, ka D. Passah, Adolescent Health Counsellor, Khliehriat CHC, East Jaiñtia Hills District, Khliehriat kawa da e ya ki kyntien pdiang wa i ekhublei na u A. Dhar, DPM, NHM, East Jaiñtia Hills District.
