Ka Seiñraij Khynroo Shangpung Pohshnong (SKSP), chirup deilang waka Akhil Bharatiya Vidyarthi Parishad da leh kynmoo warom ki yaka lyngkhooh snem yap wa 162 snem yong u Woh Kiri Daloi Dhar, uwa man kam uwi na ki khlawait yong ka Ri Jaiñtia wa da chah siat yap ha u kuli yong ki chipai pharæng haka thma Jaiñtia 1862 ha ki wynta yong ka Elaka Shangpung ha madanthma Lummukut.
Ya kani ka lehwarom da sdang nadooh ka 04-02-24 deiwa pynkhooid yaka duwan yong oo da ka Teakwondo Shangpung West Jaiñtia Hills.
Ynne ka 5 tarik heipor wa dang step ngiap ngiap, heipor 5:00 waje da pynman yaka yakob Phet-Thong (Marathon) wa da ya chimbynta da ki khynroo khyllood yong ka chnong Shangpung kamjooh wa na kiwi tawon ki chnong.
Neitæ heipor 10:00 waje i step da pynman ya ka suit ka choor da ki waheh Seiñ Raij, pynbood won da ka booh syntu da ka SKSP waka Seiñ Manbei Shangpung Pohshnong deilang wa ki dkhot ka ABVP Shangpung Unit ha u dur moo sahnaam yong u Woh Kiri Daloi Dhar ha madanthma Lummukut Shangpung ha ka thaw wa chah siat yap u.
Da pynlai ya kani ka Sari Yakutkam da u Junom Suiam, President ka SKKSP. Yaka Parom chaphang u Woh Kiri Dhar da khana da u Heibormi Sungoh, uwa thohkot ka thaaiñ wei da yoh leh yei klam tbian na u Vice President ka ABVP Shangpung Unit, u Tennyson Suchiang.
Da pynchongchit ya kani ka yakutkaam da i rwai tynre na ki dkhot ka ABVP Shangpung Unit katwa yei kyntien e khublei da e da u Organising Secretary ka Seiñraij Khynroo Shangpung Pohsnong, u Teilang S Manner.
Discussion about this post