Ka seiñ kiwa manbei manpa kiwa em i duna hei doh i pran namo ka Parents Association for Persons with Disability da lehwarom ki ya ka sngi kiwa kyrpang haka 3 tarik uni u bnai ha Kyndongtuber, West Jaiñtia Hills deiwa kyrchaan ka Bethany Society Phramer waka Indian Social Responsibility Network (ISRN).
Ya ini i lehwarom ya kiwa kyrpang da leh ha Lum RC Kyndongtuber.
Ha kani ka yalang da wan chimbynta da ki manbei manpa, ki waheh ka chnong, ki dkhot ki SHG wa kiwi kiwi.
U kongsan ha kani ka sngi toh u Enrico D Pasi naka chnong Nangbah uwa da wan mihkhmat neibynta u MLA ka thaaiñ u Comingone Ymbon.
U Enrico Pasi hawa e yei klam da pynsñiaw u yei sñiawkhia u wa i emkaam wow sñiawthooh ya ki bru wa kyrpang wa da wa chna kyrpang u Blai wei kiwa chong chnong kiwa biang wa dap pura emkaam toh u burom ki ya ki, ymtoh u em ñiawbeiñ ya ki.
Da yoh leh i e sñiawbha ya kini ki parachnong wei da em leh ki rwai wa ki yakehke.
Kani toh katkam ka Wyrta u Waheh Chnong ka Kyndongtuber, u Shiwa Siangshai.
