Da man i kyrkhu yaka wah Lukha nadooh wa em ka Lockdown: KSU Sonapyrdi

Jowai: Ka Khasi Students’ Union (KSU) Sonapyrdi Unit da pynsngaw ko i kmen wa hadien i pynkrehkaam yaka Lockdown haka District ka jylla waka ri waroh kawi neidaw u khñiang COVID-19, da wanrah biang sa chisien yei dur wa yoosuk ka wah Lukha kam haki por nachwa haki snem 2007 chadien, heiwa ki dakha da sdang biang ki wow em ha kani ka wah.

Ini pynyoo ko wa hadooh katwon neiwa krehkam ki kharkhana pynmih khyndaw-bilat (Cement Plant) haka thaaiñ Narpuh ktah sakhiat ko yeidur wei man i long kani ka wah, neibhah waki kharkhana pynkai bait ki yei tngit wa mih cha kani ka wah.

Kamtæ ka seiñ da dawa ko na ka sorkar jylla wa toh u leh deiwa khor wei daiñ kuna da ki klur lada ki kharkhana wa em ha ka thaaiñ Narpuh dang pteiñ ki u pynkai tngit cha ki wah.

Neitæ kyntu ko leh yaka sorkar wow hukum smat yaki karkhana u pynbiang ki yaki STP, ETP, næ ki thaw pynlang tngit yow khang nei pynkai kat chawa em.

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Da ong wa kiwi kiwi ki jylla næ ki ri ka pyrthai roi paar ki toh wa em ki karkhana ne Industries, heiwa wanrah ki yei yoh khih yoh kreh, wei ki um ki wah leh wym em tngit ki neibhah wa biang ki thaw pynlang tngit katkam ka juk stad thymme. Te lada ka sorkar pynkhor ko ya ki karkhana wa em ha kini ki thaaiñ ym nood de ki wow leh taroi.

“Hao ka wah Lukha jooh rap khooid hi ko ha kini ki por, tangwa wym jooh neh slem ko neibhah wa i pynkai tngit naki karkhana pteiñ bait ki, katwa heini por won neh slem ko wei i khooid leh rap phær neidaw wada khang lut yaki karkhana”.

Kamtæ ka sorkar toh u chimkhia ko ya kani ka kaam neibynta u pynneh pynsah yei yoosuk ka wah Lukha, wei ki dakha leh u boon biang ki ha kani ka wah neibynta i myntoi ki pateiñ hadien.

Chooh chooh ka seiñ hei yaklam wa kiwa chnong chnong wa marjan wa ki karkhana, ong ki wa nadooh wa khang ki karkhana, ki chnong ki thaw da khooid biang, ka rymaw ki soodong yong ki chnong da yirngam ki wei wym em laphooh de.

Em naki kattu katni ki manbei ong ki wada suk u lum yung lum sem nadooh wa khang ki karkhana. Ini pynyoo wa hadooh katwon ka tdem ki laphooh wa mih na ki karkhana ktah ko yaki bru wa ki chnong wa marjan.