Jowai : Ha itai i dur da yoo ya arngut ki khynnah kynthai ki wa ku ya ka gate wa jrong yong kani ka park ki khynnah kawa em ha chrooh i yung thaw sah u DC ha Mynthong, Jowai.
Katkam wa man kattæ ya katai ka park ha Mynthong dang chna ya ka wei wa ym pu em wai paidbah ya ka hadooh katni. Tangwa hadooh katwon ye u kynnoh yei wa leh ki khynnah neibhah kat cha wa peit ki thaw kyndehke næ ki park neibynta ki khynnah ha talawiar ka chnong Jowai boon na ki man ki kiwa da jed da pra ki wym miat de yow kyndeh ke ki.
Ka Park warim ha Jowai kawa em harood ka Nan Kasari ya kawa da tip leh ka Thaw Thang Sati ka Kur Dkhar man ko ka thaw wa jooh em ki tiar kyndehke kam ka wow chongsatliang, ka sakyr-iat, ka sapdoi wa kiwi kiwi tangwa ha ki kajak snem wa da lai da chna pynmiat ya kani ka thaw tangwa ym em de kini ki tiar kyndehke.
Kiwa dang miat ki park katni ha chnong Jowai em ki ha Khimusniang wa ha Salaroh man ki kiwa da jngai na kiwa boon ki khynnah wow lai yalehke.
Lada kyruiñ won cha ki park wa em ha Dulong, Panaliar, Chilliang Raij leh ki wa sah du i naam neibhah yoosar lakam wa da mylliñ ki khynnah ha ka juk katni u yalehke ha kini ki thaw neidaw wa barabor man ki ki thaw kiwa thylli.
Ini i duna ki thaw yalehke neibynta ki khynnah ye hi ko maai u yah ya ki, u thooh lad wow pyllut yei por yong ki da ki kaam wa sih?
Lada ka sorkar man ko ka wow pynmiat pynbha wow pynku ya ka imlang sahlang ileh ya kam kini waroh ieh khonswet ki?
Discussion about this post