Ynnin, kawi ka manyung na Loompyrdi Iongpiah wa kynthup ya ka manbei wa ar ngut i khon da yoh ki ya u COVID-19 (Positive) katwa i khon khian dooh kani ka manbei iwa dang 7 snem toh iwa ym em chah ktah ha uni u khñiang namo iwa man Negative.
Kani ka manbei da pyntip ko wa ynnin i janmiet ka 20 tarik heipor kamwa 5:54 da yoh ko ya i Message wa pyntip wa ka khon khian ka yong ka kawa 7 snem man Negative ka Report ko katwa heipor kamwa 6:15 da yoh Phone ko na kawi ka Doctor wa pyntip wa ka (kani ka manbei) wa ki 2 ngut ki khon yong ka da man Positive ki wei da kylli lada kwah ki wow lai chong chah sumaar ha i thaw wa da pynkhreh (Institutional Quarantine) wei kani ka manbei da kylli ko wa kammon u ieh ko ya kani ka khon khian yong ka ha yung.
Chooh chooh da ong ko wa da Phone ko cha ki bor ka Dorbar Chnong yong ki wow paan thaw chong hapoh i thaw wa da pynkhreh (Quarantine Center) ka chnong wei yeini da kyntait ka chnong wei hadien won kani ka manbei da rai ko wow lai cha i thaw ka Quarantine ka sorkar wei wow booh ya ka khon yong ka ha i thaw ka chnong wow ri wow pait won da kiwa hayung hasem yong ka tangwa ya ini leh da chem chitom wow ye u leh neidaw kiwa boon toh kiwa tieñ wow chim ya ka khon yong ka.
Kani ka manbei da ong ko wa i daw wa kwah ko wow lai cha i thaw ka sorkar toh wa i yung wa sah ki toh iwa khynnia wei iwa em mar khap wa kiwi ki yung kiwa boon ki khynnah wa ki bru kiwa da heh i rta wei deiwa lai cha kini ki thaw ka sorkar ki marjan yung leh daw sñiaw chngaaiñ ki.
Da kylli ko leh wa neiyi i daw wa slem ka sorkar wow phah wan thooh ya ki neibhah wa da pynkhreh wei da song ki leh ya ki tiar wow lai chah sumaar ha i thaw ka sorkar?
Hawa yaklam wa u Deputy Commissioner ka West Jaiñtia Hills, u Garod LNS Dykes heiyatoh wa ini, da pyntip u wa ynnin da yaklam hajrong ini i jooh i kaam wei ki Doctor da pyntip ki wa kani ka manbei da kwah ko wow yah wa i khon khian yong ka cha ka Institutional Quarantine Center neibhah wa ym em wow pait ya ini i khynnah wei kani ka thaw ka sorkar toh kawa man kam ka Ward wei ymye u pdiang ya i khynnah wa man Negative neibhah daw haap chong wa kiwi tawon ki bru kiwa chah ktah ha uni u khñiang.
U Garod da pyntip u leh wa ka chnat i chait i khiah da pynchlur ko leh wow chong sumaar ha yung wei wow leh ya ka Home Isolation.
Da pyntip u leh wa ha ki yalang wa da pynman ha kini ki sngi wa dadep da pynchlur yei wow booh ya ki Quarantine Center ha ki chnong neibynta wow sumaar ya kiwa chah ktah ha uni u khñiang wei daw kyrchaan leh ya ini da ki bor ka District.
Hadooh wa yaklam khaddooh wa kani ka manbei heipor kamwa 10:45 ynne i step dang em ko wa ki khon yong ka ha yung wei ym kwah ko wa ki jan yung u chah ktah ki ha uni u khñiang.
