Ynne ka sngi da pdiang burom ya ki 7 ngut ki khloor yalehke Kickboxing ka Ri-loom Jaiñtia kiwa da mihkhmat ya ka jylla ha ka lympung WAKO India Senior National Kickboxing Championship 2021 kawa da man ha Goa heiwa na kini ki 7 ngut ki 3 ngut da yoh ki 4 tylli ki takma.
Kam wow pynkynmoo heini, ha kani ka lympung u Hame Shaniah Suiam uwa na Shangpung da yoh u ar tylli ki takma (ksiar wa rupa), ka Nisanshwa Lyngdoh na Shangpung wa u Bantei Sungoh na Shangpung da yoh ki mar kawi ka takma tama. Kiwi de kiwa lai chimbynta toh u Heimonmi Suchiang na Shangpung, u Teimiki Sungoh na Shangpung, u Pynshrainmiki Rabon na Shangpung wa u Mighty Sword Tyngkan na Mowkyndeng.
Ya i pdiang burom ya kini ki 7 ngut da pynman ha Yingkieñ Myntdu, heiwa da pynman ya ka da ka seiñ Bouncers Association of Meghalaya- Jaiñtia Hills (BAM-JH) heiwa da em ka yalang wa tbian kawa pynlai da u Yoosar Kynjing uwa man u President ka seiñ wei da pynkup burom ya ki 3 ngut wa yoh takma da u Iahmi Khyriem uwa man uwa ebuit (Adviser) ka seiñ.
Chooh chooh ha kani ka sngi da emlang ki dkhot ka JSU hapoh i yahkhmat u General Secretary yong ka, u T. Suchen heiwa da e sñiawbha ki leh cha ki 7 ngut.
Neiliang u Hame Shaniah Suiam da ong u wa ha kani ka kynti ka sorkar jylla lyngba u montri ka chnat Sports u Banteidor Lyngdoh da e yarap u ya ka bai luti da ka Bus cha Guwahati wa ka bai baam wei da kular u leh wow e yarap chooh ya ki neini chaphrang.
