Ka DC ka East Khasi Hills District da pyntip ko wa da yoh yutip na u Incident Commander uwa man leh kam u Block Development Officer, Mawryngkneng C&RD Block wa kiwa chong dai kamjooh kiwa wan khayi deilang wa ki bru paidbah ha Smit wa ha yaw Lad Smit ym em bood ki ya ki kyndon yada na u COVID-19 hanla da dep wow booh yei por wow wai ki dukan wei wow mih du wow lai thied ya ki marbaam wa mardih wa emkaam tangwa ym em wa bna wow bood ya ki kyndon ka chnat i chait i khiah heiwa ki bru leh boon yalang ki ha ki thaw pynman yaw wei ym em leh deiñ ki ya ki Mask wei wow yajngai uwi ya uwi.
Kamtæ da ong wa ini i wym bood kyndon toh iwa sñiawkhia neidaw wa joor wa poor u khñiang COVID-19 katni.
Hajrong kini ki yurim wei hapoh ka aiñ Meghalaya Epidemic Diseases, COVID-19 Regulations, 2020 yow ye u kdoh u khoom yei yabi u khñiang khlam, da phah khang ya ka yaw ha Lad Smit wa ka yaw Smit hadooh wa pynmih hukum da kamwi .
U Block Development Officer, Mawryngkneng C&RD Block daw khut pynman yalang u wa u Syiem ka Hima Khyrim, ki Sordar, ki CCMT wa ki Market Committee hajrong ini chwa wow wai biang yow pyntikna wa da bood ya ki kyndon thij da waroh.
