U Symbood Montri Rangbah ka jylla uwa pait leh ya ka chnat PWD (Roads), u Prestone Tynsong da pyntip u wa da dep phah ya ka chnat wow pynchna smat ya ki sarok kiwa da chah ktah ha u slap wa joor ha kini ki sngi.
Da ong u wa da phah ya u Commissioner & Secretary, u Secretary wa waroh ki Engineer wow man ki kiwa da pynkhreh hawa em iwon iwon iwa jia wei wow pynchna smat.
I chah ktah ki luti ki syngkieñ da joor bha ha ka thaaiñ Narpuh khamtam ha ki bynta u sarok NH-06 ha ki bynta ka Sonapur Tunnel nadooh ka 11 tarik uni u bnai wei da em biang i oor moo ha ka thaaiñ Rngain yong u sarok Shillong-Dawki.
Neibynta ka Rngain da pyntip u wa da dep phah ya ki sahep ka NHIDCL wow man ki kiwa da pynkhreh waroh 24 kynta wei da ye ki leh wow pynkhooid ya iwon iwon du hapoh kattu katni kynta.
Kam wow pynkynmoo wa ha Rngain ini wa dep da khlaad ar ngut ki bru hadien wa oor i khyndaw deilang wa ki moo kiwa da ban ya ka kari wa lai luti ki wei da em leh ka FIR wa da e, hajrong ini da ong u wa ka takit dang lai ko wei ki pulit daw phah ki ya ka bui (Report) cha ka sorkar.
Heiyatoh won wa u NH-06 da ong u wa ya uni u sarok toh uwa pait da ka NHAI wei ka PWD ym emkti wow pynchna ya uni u sarok.
Da pynche u leh wa ya u sarok Shillong-Dawki da e kti cha ka NHIDCL katwa ya u sarok Shillong-Guwahati-Jorabat wei hadooh ha Sonapur da e kti cha ka NHAI wei kini ki ar tylli ki chnat toh kiwa pait da ka Ministry of Road Transport & Highways hanla kattæ leh da ong u wa da yaklam wa ki yow pyntikna wym chah ktah yei lai i wan ki kari wei da wan leh ki bru wa chemphang na Delhi heiyatoh wa i chna sarok kiwa e buit cha ka sorkar pyrdi kammon u leh.
