Shillong: Ka Deputy Commissioner (Supply), East Khasi Hills da pyntip ko wa ka Ministry of Consumer Affairs, Food and Public Distribution deilang waka sorkar jylla katkam wa da kdaw haka National Food Security Act, 2013, Reforms in Targeted Public Distribution System Chapter V Section 12 (2) (c), da pynemkaam ya u Aadhaar yow tipmit ya kiwi pa kiwi kiwa yoh myntoi.
Kamtæ da ong ko wa neidaw wa ha ka jylla leh u sdang noh wow booh wow pyndait ya ki kor wa tip kam ki ePoS Devices ha waroh ki dukan rachon (Fair Price Shop), da man ko emkaam ya waroh ki khlieh ki manyung mansem wa haap hapoh ka NFSA (AAY wa PHH) wow em pyrtuid ki hapoh Aadhaar yow man ko iwa khooid wei ryntih i pynkrehkaam yaka “One Nation One Ration Card” System.
Kani ka One Nation One Ration Card toh kawa da sdang daka sorkar pyrdi heiwa emkaam du kawi ka card rachon ka wow ye u pynemkaam ha waroh kawi ka ri wei ym dooh yei hok lada em cha baar ka jylla, baar chnong heiwa yei bhah u yoh bait.
Hajrong ini, da phah ya waroh ki khlieh ki manyung mansem kiwa em yaki AAY lane PHH Card hapoh ka East Khasi Hills District wow lai ki cha ki Aadhaar Enrollment Centres kiwa da em hapoh ka yung krehkaam ka Deputy Commissioner, East Khasi Hills District, Shillong wa ha ki yung krehkaam ki Block Development Officers (BDO) hapoh East Khasi Hills District. I por wa ye u yaleh Aadhaar toh haki por krehkaam.
Ha ki por wa yaleh Aadhaar, neidaw wa em ka khlaam COVID-19, ki laad yada kamjooh ki kyndon wa da pynmih daka Department of Health & Family Welfare, ka sorkar Meghalaya naki por cha ki por toh u bood yaki thij.
Ha iwi tawon i liang, ka Deputy Commissioner (Supply), East Khasi Hills da pyntip ko wa ya u khoo hapoh PMGKAY Scheme neibynta u bnai July 2020 da pynlait yow saam mynkna lyngba ki dukan Fair Price Shop.
Ya u khoo u saam 5 kg chi khlieh kawi ka AAY wa PHH Card.
