Ka District Election Officer (DEO), East Khasi Hills da pynmih hukum ko hadien wa da chem wa ki seiñ saiñhima namo ki Political Party da booh ki ya ki Banner, ki lama wa kiwi de ki jait pynriam Party ha kylleiñ ka Shillong wa kamjooh leh ha ka District waroh kawi wei kini waroh toh kiwa da ieh khlem da pynlang hadien wa pynman ya ki yalang paidbah.
Ini i leh kini ki Party da pynthut ko heijooh i por ya ka luti syngkieñ wa ki thaw lai thaw wan ki paidbah hapoh ka sor Shillong heiwa kini ki Banner, ki Hoarding kamjooh ki lama da booh ya ki thaw wa pynthut ya ki paidbah wei yeini da leh khlem da yoh bor.
Chooh chooh da ong wa da em wa booh ya ki lama wa kiwi de ki dak namo ki Signage ki Party ha ki yung krehkaam sorkar iwa man pyrchah ya ki kyndon ka Election Commission of India.
Kamtæ ka DEO da phah ko ya waroh ki Political Party wow paan bor chwa ki na ka yung krehkaam ka DC (Election), East Khasi Hills lane na kiwi ki bor sorkar.
Da phah leh wa waroh kiwa da pynriam nadooh ki lama, ki Banner, ki Hoarding wa ki Signage wa toh u looid u pynlang ki wut-wut mar ya dep pynman ya ka yalang.
