“Ka ktien Khasi toh ka ktien kawa da rim tam hapoh ka ri India, neibhah u Khasi da em u nadooh 57,000 snem nachwa,” da ong u Disparsing Rani uwa yaleh RTI wa paaw yong ka jylla hawa klam wa ki laad pathai khubor.
Katkam wa khana u Rani, da ong u wa ha u snem 2007 u Spencer Wells uwa man u Director Geographic Society of India da yarap u wow tip ya i tre yong ka ktien Khasi, heiwa oo da thooh bniah u na ki 92 ngut ki bru wei katkam ka bui (Report), ka ktien Khasi kawa haap ha ka Astro Asiatic Language, toh ka ktien kawa da rim tam ha India neibhah ki Khasi da em ki heini la 57,000 snem.
Da ong chooh chooh u wa ka ktien Khasi toh ka ktien kawa da rim tam, wei toh ka ktien kawa da rim tam ha ri India, toh ka ktien wa da paaw bha ha ka thaaiñ Northeast wei da psiah ko leh hapoh ka Kolkata University nadooh ki snem 1900.
Da khana u wa ki Hima kam ka Hima Madur Maskut leh da thoh ha ka Mahabharata, wei da chem leh wa ki Khasi ki da tip ki wow saiñ nar nadooh 2000 snem nachwa.
Hawa yatoh wa i thooh RTI yei pynlai luti ya ka ktien Khasi wow yoh yei tipmit hadien wa da mynjur da ka Yung Dorbar Chna Aiñ ha ka 4 tarik u Kmaichonglad (Dec) 2018, u Rani da khana u wa hawa thooh yutip na ka sorkar jylla da khana ko wa i kaam dang lai i, tangwa hawa thooh yutip na ka sorkar India, da khana u wa ka ktien Khasi ka em ko ha ka ‘Administrative’ lane ka luti wa khaddooh chwa wow rah ha Parliament.
U Disparsing Rani da ong u wa man iwa sñiawsuk wa da lai i cha ka luti wa khaddooh wei em kyrmen wow yoh yei tipmit noh ha ka Eight Schedule yong ka Riti Synchaar ka ri India.
