Jowai: U District Magistrate, ka West Jaiñtia Hills da pyntip u wa katkam i tyrwa ka yung krehkaam u District Medical and Health Officer, West Jaiñtia Hills District, Jowai da pteiñ ya ki sngi wow man Containment Area ki kattu katni ki chnong hapoh ka District.
Kini ki chnong kynthup ki ya ka Amlarem, Krangpamtdong Amsarim, Ladjaplem Amshipai, Lai Lyngdoh wa Amlatdoh, kiwa haap hapoh ka Amlarem Civil Sub-Division wa ka New Hill Jowai (kawa haap hapoh ka Ladthadlaboh Urban PHC).
I por wow pteiñ wow man kini ki chnong kam ki Containment Area toh nadooh 6:00 i step ka 29 uni u bnai hadooh 6:00 i step ka 1 Naisaphra 2020.
Chooh chooh u District Magistrate da pyntip u wa da leh yeini toh wow e por ya ki bru ka chnat i chait i khiah wow pyndep yeiwa emkaam kam ka Contact Tracing ha kini ki chnong wei wow booddien yei chait i khiah yong ki wei wow pyntikna wa ym em wa mih na kini ki chnong lait na kiwa emkaam sumaar jhan (Medical Emergencies).
Da khang pyrchah leh wow wai ki dukan dukdoh, u yalang paidbah wa kiwi kiwi.
Lada chem wa em kiwa leh pyrchah yeini daw chah pynchitom ki katkam ki kyndon ka Section 51(b) ka Disaster Management Act, 2005 chirup wa ka Section 188 IPC.
Heijooh i por da kyntu ya ki paidbah wow bood ryntih ki ya ki kyndon wow yada na ka khlam u COVID-19.
