Jowai: Ha ka 7 tarik uni u bnai ha ka yalang wa pynman ha Hotel Assembly, u kongsan u Dr. Jemino Mawthoh, deilang kiwa kyrchaan ya ka seiñ Meghalaya State Kickboxing Association (MSKA) hei emlang u Chief Adviser ka MSKA u Dr. Vikash Gupta kam u symbood kongsan da pynkup burom ya ki 19 ngut kiwa yalehke Kickboxing ka jylla kiwa yoh takma ha ka WAKO-India Senior National Kickboxing Championship 2018 kawa pynman ha Kolkata nadooh ka 2–5 tarik uni u bnai.
Ki Kickboxer hapoh ka lama ka Meghalaya State Kickboxing Association (MSKA) da wanrah burom ki ya ka jylla deiwa yoh 4 tylli ki takma ksiar, 5 tylli ki takma rupa wa 10 tylli ki takma tama.
Neiliang u Dr. Jemino Mawthoh hei klam yong oo da yaroh ya kiwa yoh takma wei da pynchlur u leh ya ki wow kreh chitom ki wow pynbniah chooh chooh yei sap yong ki wei da kular u leh wow yaklam wa ka sorkar jylla yow e yei kyrchaan heiwa kini da wanrah burom ki khlem yoh kyrchaan naka sorkar khamtam ha kam kini ki por wa ka sorkar dang pynkhreh ko wow pdiang ya ka 2022 National Games.
U Dr. Vikash Gupta, Chief Adviser MSKA da ong u wa dang emkaam boon ki yarap yow ye kiwa yalehke Kickboxing wow lai cha khmat deiwa pynman ya ki Training Camp, Seminar, Workshop wa kiwi kiwi wei lada ye toh u wanrah ya kiwa sikai na baar ri ki wow yarap pynku yei kyrdan yalehke.
Ka MSKA da rai ko leh wow pynman ya ka “Blood Donation Camp” yow pyn sniawthooh yei emkaam wow e snam mon sniawbha.
Discussion about this post