Jowai : Hadien wa da khang ka National Green Tribunal wow tih ya u mooyong napoh ka jylla nadooh ka 17 Naitung (April 17) 2014, ka NGT da pyllait ko wow kit ya u mooyong uwa da dep tih kajak chisien.
Ka sngi khaddooh wa da chah wow kit ya u mooyong uwa dang sah toh hadooh ka 15 Naisan, wei hadien ini da ebor ya ka sorkar jylla wow dai lilam ko ya u mooyong uwa dang sah.
Hadooh katni da em sa kamwa 30 lakh metric tonne u mooyong uwa da dep tih uwa dang sah u wympu em u kit hadooh katni.
Hei yatoh weini i khang wow tih mooyong ka ‘Hima Nongstoin Land Owner Coal Trader and Producers Association’ da ujor mukotduma ko ha ka Supreme Court yow pyndam ya ka hukum ka NGT wow khang wei wow pynsangeh yei kit ya u mooyong.
Ynne ka sngi katkam ka yutip wa da yoh da ong wa ka Supreme Court ka ri India da e hukum ko wa da pyllait wow kit biang ya u mooyong uwa dang sah uwa em kamwa 30 Lakh Metric Tonne wei ye u kit ya oo nadooh ka 1 Naichiphaw (October) 2016 hadooh ka 31 Naisan (May) 2017.
Discussion about this post