Shillong: Ka Jingiaseng Samla Balang Presbyterian Thadlaboh Jowai ha kani ka 23 tarik da pyllait paidbah ko ya ka thup rwai CD rwai Christmas wada e pyrtuid “A Christmas Carol Medley” wada pyllait da u pastor D. Lyngdoh haka yalang wa tbian wada pynman ha Youth Centre ka Balang Thadlaboh heiwa da pyllai da u Chairman ka Seiñ Khynroo J. Paswet hei sakhi lang ki dkhot ka Balang nadooh ki manbei manpa wa ki khynroo khyllood.
Chwa u yoh i pyllait paidbah da em chwa ka yaseiñ duwai heiwa da yoh i puræ naka ktien u Blai wei duwai na u Pro Pastor S.D. Mynso, i klam hei yatoh wa kani ka thup rwai na u Lyngkit Lyngdoh uwa yahkhmat ka Choir ka Jingiaseng Samla uwa da khana, wa i daw wa e mynsien u yaki u pynmih ya kani ka thup rwai toh wa ynnin snem hadien wada pynmih ki ya i sur Chaad Carol Christmas boon kiwa pan wa thooh yow yoh ki u tem ha yung ha sem wei da sñiaw ki leh wat cha baar ka Balang ki District ki Presbytery da yoh ki ka wei ka-it ki u tem, kamtæ da pyrkhat ki wa ha kani ka kynti u pyllait noh daka CD yow suk ki paidbah ki lok ki jor u yoh yaka deiwa thied heidor wa T. 100 ka wi.
Da pyntip u wa yaki sur boon hi da chna da ki khon ka Balang, wei kamwa da e pyrtuid “A Christmas Carol Medley” toh wa i sur hi yahaap i neibynta wow yachaad i wym sangeh de kamwa 28 minit i heiwa waroh ki sur da pynyabi iwi hadien iwi.
Yooluti u wa i ye u pynmih ya kani ka Album u man ko i kyrkhu yaka Jingiaseing Samla ka Balang kamjooh yaki paidbah wa thied yaka neibhah ki kyntien yong ki sur man i leh i wow pynpyrkhat chaphang ka Christmas.
U Pastor D. Lyngdoh hei klam yong oo da yaroh u ya ki khon ka Balang Thadlaboh kamjooh ya ka Music Committee wa da ye ki u pynmih ya kani ka thup, neibhah da ong u hei sñiawthooh yong oo, i rwai kamjooh deilang i tem i put hapoh yungmane hapoh ka Balang man i iwa emkaam bha ha kini ki sngi neibynta wow pynkhai im.
Da ong u wa yoosar da toh hi i por wa hapoh ka Balang, District, Presbytery kamjooh hadooh ka Synod u pynkylla i rukom pyrkhat wow booh yei rwai i put ka tem hakhmat dooh neibhah hei yoo yong oo ha kawon kawon ka thaw wa em i rwai i put i tem da em bait i khih i chit mynsien ki bru.
Kamtæ da yooluti u wa lyngba kani ka thup rwai u man i kyrkhu heiwa manda tem yaka u ktah ko leh yow nood ki bru wa ap ya ka.
Da pynkut ya ka yalang dei ktien e khublei na u H. Lyngdoh uwa man leh kam u Music Secretary.
Discussion about this post