Jowai: U Chairman ka Central Silk Board u K.M. Hanumantharayappa da wan pyllait u ya ki ar tylli ki Incubation Machine namo ki kor wow pdem pylleiñ khniang ryndia yong ka tnat Sericulture ha kawi naka Farm wa heh kamwa 14 Acre wa em ha Ummulong, West Jaintia Hills District, chirup i emlang u Wailadmiki Shylla, MLA, ka Dr. K. Trivedi, Director Central Silk Board, Berhampore West Bengal, u S.K. Barchung, Director Sericulture & Weaving ka sorkar jylla natlor kiwi won ki sahep ynnin 17 tarik u Wisu ka sngi wa pynman ki yaka Mini Resham Krishi Mela.
Ya kini ki artylli ki kor da pyllut kamwa T. 8 Lak wa haap hapoh ka scheme Intensive Bivoltine Sericulture Development Project (IBSDP), wei wa chongdor won T.4 lak ka wi ka kor.
Ka Glory Pakynteiñ, Manager Foreign Race Seed Station yong kani ka Farm da ong ko lyngba kani ka kor ye u yoh yei chit i dait wa biang katkam wa emkaam yow miat ki pylleiñ khniang, heiwa ka chit emkaam u neh bait kamwa 25 Degree Centigrade, wa i mynjær wa kamwa 80% yow yoh ya ki pylleiñ wa miat.
Hadien wa dep pyllait ya kini ki kor da em won ka yalang ha Community Hall Ummulong heiwa emlang leh wa kiwa boon ki warep na ki chnong waphær waphær ka district wa pynlai da u Dr. Collin Z Renthlei, Sc-C, REC, Shillong.
U Director Sericulture & Weaving S.K. Barchung da khana u wa i pynman ya kani ka Mela toh yow pyntip cha ki paidbah wa em chiboon ki scheme haka sorkar bei hapoh ka Ministry of Textiles kamjooh haka sorkar Jylla wa ki warep ye ki u chim kabu.
U Wailadmiki Shylla MLA, da kyntu u ya ki warep u chimkhia ki ya ki laad wa ka sorkar da e ko neibhah man i i myntoi i yoh kamai ya ki hi wei sa iwi leh kam kani ka laad khih ym da emkaam ware u man ki bru wa tip u thoh u puræ wei emkaam u yoh ya ki esikai.
Ka L. Dkhar, Retired Director Sericulture & Weaving ong ko wa emkaam u pynbha u thung ya ki dieñ, u lehkhooid wei u ri chiboon ki khniang lada kwah u yoh myntoi boon nalor wow pynbiang i baam kamjooh ki yung ki sem.
Heijooh i por da yaroh ko ya ka ri-loom Jaiñtia wa hadooh katni dang man ko kawa khlan dooh u pynmih kse rusom, wei da kyntu ko wow kreh chitom ki khnang wa yeini i naam wa em ha ki ymyoh de kiwi u knieh.
Ha kani ka sngi da pynkup burom leh ya ki 10 ngut kiwa rep naki chnong waphær waphær kiwa da rap ku hei kaam ri khniang.
Discussion about this post