Jowai: Ka seiñ kiwa kreh Nurse hapoh ri-loom Jaiñtia watip kam ki Trained Nurses Association of India Jaiñtia Hills Unit, ynne ka sngi da kynmo burom ki yaka sngi wa kyrpang yong ki ha Auditorium yong ka Shangpung Pohchnong hajrong ka phang “Nursing:The balance of mind, body and spirit”.
Kani ka sngi da man leh kam chibynta i kynmoo warom yaka sngi kha ka Florence Nightingale kawa man kawa yah luti wow pynwan dur ya i rukom kreh ki Nurse katni hawa e sumaar ko yaki chipai wada mynsoo ha i yaleh thma haki snem 1853-1856, ka thma wa tip kam ka Crimean War.
Ha kani ka sngi nalor i sakhi kiwa boon ki Nurse naki thaw waphær waphær, da emlang u Comingone Ymbon, MLA ka Raliang Constituency kam u kongsan, u Dr. Batkupar Nongkhlaw, Medical Officer Shangpung PHC kam u symbood kongsan, nalor u MDC ka Shangpung u J. Treilang Suchiang wa kiwi, haka yalang wa pynlai da u Jesper Nongrum Staff Nurse Jowai Civil Hospital Ialong.
U Comingone Ymbon, hei klam kam u kongsan da yaroh u yei rukom krehkaam ki Nurse, wei ong u, i kaam yong ki wym toh iwa suk, teiñ teiñ wot uwa kjut sñiaw u la kam wow kut laad leh, tangwa dei yarap yong ki deilang waki Doctor da wan biang i bor ki kamjooh i chait i khiah.
Kamtæ kyntu u wa toh u chimkhia ki yei kaam neibhah ki toh kiwa da em bait ha chrooh kiwa kjut wa chitom, wei iwa emkaam toh wow e ki yei wa bha tam hei chakri yow paidbah.
Neiliang u kongsan ha kani ka sngi da chim u leh ka wynta wow saam yaki Mementoes cha ki Nurse wada chong ngiah, kam ka dak i sñiawngooh sñiawburom yei chakri wa da e ki yaka imlang sahlang, wa kynthup yaka Phrimty Sungoh wada chong ngiah kam ka Nursing Superintendent, ka Newly Tang wada chong ngiah kam ka Assistant Superintendent, kiwa da chong ngiah kam ki ANM won kynthup ka Itretcy Chyne, Kloit Sutnga waka Merimai Gashnga.
Da pyn chongchit ya kani ka sngi dei chaad i lehke drama tbian wa kiwi kiwi.
Discussion about this post