U Symbood Montri Rangbah ka jylla wa pait leh ya ka chnat PWD (Roads), u Prestone Tynsong da khana u wa i pynkreh ya u sarok Bypass wa 8-10 Km ha Pynursla u sdang noh.
Da khana u wa neiliang ka sorkar da khut ko ya ka National Highways & Infrastructure Development Corporation Ltd (NHIDCL) wei kamjooh ya ki sahep ki chnat waphær waphær wow bichar yei kaam wa yatoh wa i chna ya u sarok na Shillong chadooh Tamabil, heiwa da pyntip u leh wa neiliang ka sorkar da mynjur ko ya ka luti wow pynlai ya u sarok wei ya ini ka NHIDCL daw pyntip ko cha ka Ministry of Road Transport & Highways.
Hawa kylli, u Prestone da pdiang u wa em i pynslem wow pynkreh ya uni u sarok heiwa da kdaw leh wa iwi na ki daw wa pynman wow slem toh neidaw wym yoh thaw, neibhah lada em du uwi u tre u wym kwah wow e thaw, waroh i kreh da sahkut, wei ki DC hap ki wow khut biang ya ka yalang da ki phaw sien wa ki sahep kiwa hap wow lai boonsien leh cha ki thaw yow pait kammon wow pynchong pynlai ya u sarok.
Da ong u leh wa kamwa man katni, i slem toh neidaw wym yoh ryntih yei thaw wei kattæ dang dep wow pynbiang lut yeiwa emkaam yow yoh u sdang noh yei kaam.
Heijooh i por u Prestone uwa man leh u MLA ka Pynursla da khana u wa ka sorkar da yaklam leh yei sih uni u sarok ha ka thaaiñ Pynursla, wei da khana u wa ka NHIDCL daw sdang smat noh ko u pynchna wei mar ya rang u slap u sdang noh u siang rong.
Discussion about this post