Ka Jaiñtia Hills Autonomous District Council (JHADC) lyngba ka Executive Committee wa yahkhmat da u CEM Thombor Shiwat da angnood ko wa ka sorkar jylla u pynbait smat noh ko ya u pood wa ka jylla Assam ha chwa wa ka Meghalaya u lehwarom ko ko yei dap 50 snem.
Yeini i angnood da pynsñiaw da kiwa boon ki MDC ka JHADC kiwa da chimbynta ha ka Dorbar L’yiur ynne ka sngi hajrong ka phang wa khroo namo ka Motion wa da pynkhreh da u MDC ka Sohmynting Khliehtyrchi, u Lakhon Dkhar tangwa neidaw wym ye u kiar wym ye u wow poi dorbar ynne ka sngi wei da wanrah noh ya kani ka phang da u Dawan Lyngdoh lyngba i e bor u Chairman katkam ka yutip wa da yoh pdiang u.
“Tip hi i wa ini wymtoh i kaamram yong ka JHADC wow pynbait yow pood u saam, tangwa hawa pait yaka riti dustur, ka khyndaw ka chyiap wei kawa e kot Pata cha ki paaid wa chong chnong, sñiaw i wa man iwa emkaam tam ya i wow e yutip chaka sorkar jylla yei won iwon i kyntoor pood ka Assam,” da ong u Dawan Lyngdoh hawa wanrah yaka Motion.
Da pynkynmoo haroh u yei kulmar wa jia neipor cheipor wa ki paidbah ha khappood chah tynjooh ki, nadooh i chah pyndik ki thaw rep thaw riang wei chah maham ha kiwa boon rukom.
U MDC, Aiborlang Shadap hawa pachat yumut da ong u wa i kaam pood toh iwa kongsan tam, khnang wa ki paidbah u chngaaiñ ki, wei hapoh ki 49 tylli ki snem i lai luti ka jylla, i khajia pood wa ka Assam jia bait i neipor cheipor.
Da ong u wa i dooh noh ya ki phaw tylli ki chnong Pnar wa em ha ki thaaiñ khappood wa tip kam ka Labang Nangphyllut nadooh wa chah phiah noh ya ka, ka Assam da wan kam noh ko kamwa chibynta ki thaw wa haap hapoh kitai ki jaitbru, ini da man i i dooh wa khroo.
Chooh chooh da ong u, “Nachwa da tip wa ka ri Jaiñtia toh ka ‘Ri Khadar Dolloi’ tangwa kamwa man katni i dooh noh ya katai kawi ka Elaka da man i dooh wa khroo yaka Council, khamtam ya kitai ki jaitbru kiwa ym em de kiwa pait wa synchaar”.
Heijooh i por da ong u wa neiliang ka Assam da pynyoo bor bha ko hadooh kattæ kattæ deiwa kdaw ya ki kaam thombor wa boonjait heiwa hajrong wa pynboon ya ki Border Police Outpost, wei kamjooh wym em leh u burom ko ya i rai wa da chim wow ya pyntip markylliang hawa wanrah ya ki kaam pynroi ha thaaiñ khappood.
Neiliang u CEM ka Council u Thombor Shiwat khana u wa ka EC hi hapoh i yahkhmat yong oo neipor cheipor da pynchlur yaki paidbah ka thaaiñ khappod wow wan mih cha ka Council neibynta u pynbiang ya ki kot ki sla yong ki thaw yong ki heiwa u su ki rap duna wei daw pynsmat leh yei por wa leh kot ki, tangwa boon ki wym bieñ u yaleh ya ki kot yong ki na ka Council kam ki Pata wa ki Sanat.
Katkam i yoo yong oo, da ong u wa em ki bru wa sah haki thaaiñ khappod hi kiwa pynmih awri awra du nei daw wow yoh myntoi waroh arliang, neibhah em napyrdi ki paidbah wa em EPIC ha waroh ar jylla (Meghalaya wa Assam).
Kamtæ da kyntu u wa ymtoh de i por wow ya pait wei pynbaad iwi ya iwi næ u pait su yeiwa lait, tangwa toh u yakrehlang wa i e yumut lang yei duna ka jylla, ka District khnang yow ye u poi ha i thong yong i jop.
Da ong u leh wa la ha iwon iwon i dur ka sorkar jylla pynbait ko leh, ka Council hi sñiawkhia ko yeitæ deiwa pynrap wa neiliang ka JHADC leh da dep pynbiang lut ko ya ki kot ki sla katkam i emkaam yong ka sorkar jylla yow pynbait pood.
