Shillong: Ka District Magistrate, East Khasi Hills District haka hukum wa pynmih ynne ka sngi da pyntip ko wa da yoh yaka Report na u Incident Commander Zone-VI wa u Medical Officer In-charge ka Madanrting UPHC da em i ku syndet kiwa yoh COVID-19 ha kini ki sngi wa dep ha Madanrting wei yow ye u khanglaad yei poor uni u khñiang kamjooh yow yada ya kitu kiwa ye u yoh ya uni u khñiang deiwa lai na iwi i yung cha iwi yow thooh ya kitu kiwa da em chwa yei chitom deiwa booddien leh ya kitu kiwa yahchem wa kiwa yoh ya uni u khñiang kamjooh yow ye u leh yaki Test, da hap wow pynman Containment Area ya i Block D, Block E wa Block F ka Madanrting yow khang yei psiah i mih khlem da yoh bor.
Ki thaw wa da pynbna Containment Area toh kamni ha wah:
Block D wa kynthup ya i yung ka Queen Kharkongor na neiñ, i madan bol na mihsing, i yung u Theodore Nongsteng na wah wa i thaw u Michael Kharkongor na sepsngi.
Block E wa kynthup ya i yung ka Sange na neiñ, RYMA Parking Lot na wah, i yung u Ratle na mihsngi wa i yung u Sam na sepsngi.
Block F (Area 1) i khloo na neiñ, i yung ka Anita Marboh na wah, i yung u Rudolf Pyrbot na mihsngi wa i yung ka Philomena Nongbet na sepsngi.
Block F (Area 2) i ICI Building na neiñ, i yung P. Pariat na wah, Green Building na mihsngi wa i yung u Wilson Kharumnuid na sepsngi.
Da kyntu leh ya kiwon kiwon kiwa em hapoh kini ki Containment Area kiwa em ki dak ki chin wa yoh COVID-19 lane kiwa emkaam i yarap wow phone ki ha u 108 lane deiwa pyntip cha ki CCMT/Medical Officer/Incident Commander.
Ya ki mar wa emkaam daw li saam lyngba ki dukan wa da jied da ki jar jiar ki dong deiwa pynbait wa ki CCMT wa Incident Commander.
Kani ka hukum u krehkaam ko nadooh ka 3 tarik uni u bnai hadooh wa pynmih hukum da kamwi.
