U Sub-Divisional Magistrate ka Mairang Civil Sub-Division, Mairang ha ka hukum wa da pynmih ynne ka sngi da pyntip wa neidaw wa ku smat kiwa yoh COVID-19 wa ki High Risk Contact ha ka thaaiñ Kynshi Pyllun, Mairang Civil Sub-Division, da pynbna ya kani ka thaaiñ wa kynthup ya ki chnong Kynshi Mawria, Kynshi Bangla, Kynshi Raishan, Kynshi Mawteijrong, Kynshi Mawtadain wa Kynshi Mawphanain kam ka Containment Zone kam chibynta wow khanglaad wei wow kdoh u khoom yei poor u khñiang COVID-19.
Katkam kani ka hukum, ym chah ya kiwon kiwon wow psiah ha katai ka Containment Zone lait noh ki wakreh ka chnat i chait i khiah wa kitu kiwa da yohbor na u Incident Commander wei waroh kiwa chong chnong toh u chong ki khop ha yung lait noh ki warep wa kitu kiwa embynta wa i kaam mylla 100 sngi. Kiwa chong chnong kiwa lai rap toh u lai bait du cha ki lyngkha rep wei wow liwan sak cha yung khlem da leh ya kiwi kiwi won wei hawa yatoh wa i pynkreh ya i kaam mylla 100 sngi, ki Secretary yong ki VEC toh u pyntikna wa waroh ki wakreh toh u bood ryntih ki ya waroh ki Protocol yong ka sorkar hawa yatoh wa ka laad yada na ka khlam COVID-19.
Chooh chooh, waroh ki dukan u khang lut ki lait noh ki dukan dai marbaam kiwa toh u wai katkam i por wa da pynbait da ki bor pynlai chnong, ki CCMT wa u Incident Commander.
Kiwon kiwon ki kaam chna yung chna sarok toh u sangeh ki chi syndon wei waroh ki yung krehkaam lane ki Bank kiwa em ha u pood u ang yong kani ka Containment Zone ym toh u wai ki katwa dang krehkaam ka hukum.
Kani ka hukum toh kawa krehkaam nadooh 5 waje i step ka 17 tarik uni u bnai.
Kam wow kdaw heini wa nadooh wa da sdang ka khlam COVID-19 wei hadooh ynne, hadooh 236 ngut ki paidbah wa chong chnong yong ka thaaiñ Kynshi Pyllun kiwa da chah ktah ha kani ka khlam wei kattæ da em kamwa 51 ngut kiwa chong chnong na kani ka thaaiñ kiwa dang em ya u khñiang COVID-19.
