Shillong: U Montri wa pait yaka chnat i chait i khiah ha ka jylla, u Alexander Laloo Hek deilang wa u Director of Health Services (DHS) u Dr. Aman War ynne ka sngi da lai ki wow sylli ya ka thaaiñ Keating Road.
Ini i lai yong u Montri toh wow pyntikna ya ki bru wa yoh COVID-19 wa ym toh wow mih ki mih na ki yung ki sem.
U Hek da ong u wa ka sorkar da yoh ko yaka ujor na ka Keating Road Management Committee, neidaw wym sñiaw chngaaiñ ki paidbah, wei ha kani ka sngi neiliang u Hek da pyntip u leh wa da khangsbak wow pynbna Containment Area ya ki ar tylli ki yung ha katai ka thaw, wei ym chah ya ki bru wow mih næ wow psiah ha kitai ki yung wa em kiwa yoh COVID-19.
