Neidaw wa em wa yoh COVID-19 kamjooh da em kiwa em hei maa wow yoh ya uni u khñiang ha yung u Hunbait Challam wa em ha Dulong Jowai heiwa ya kiwa yachem wa kiwa yoh ya uni u khñiang kamjooh kiwa yachem pateiñ da emkaam wow booddien yaki, u leh yaki Test, u leh Quarantine yow yada nei poor uni u khñiang.
Kamtæ u District Magistrate ka West Jaiñtia Hills District da pynbna u ya i yung wa i thaw wa em i yung u Hunbait Challam ha Dulong, Jowai yow man ki kam i Micro Containment Zone yow khang yei psiah i mih khlem da yoh bor cha ini i thaw.
Waroh kiwa em hapoh ini i thaw toh u neh bait ki hapoh yung katwa kiwa na baar ym chah wow psiah ki cha ini i thaw.
Ym chah leh wow pynman yaki yalang paidbah, u wai yaki dukan, ki yung krehkaam sorkar, ki yong ki bru samen wa em ha ini i thaw.
Kani ka hukum ym em khang ko yaki wakreh Health, ki wakreh (Essential Worker) ka Jowai Municipal Board, ki laad pathai khubor, ki Petrol Pump wa kiwa li booh kum kas LPG .
Ya kiwa leh pyrchah daw pynchitom katkam ka aiñ Disaster Management Act, 2005 waka IPC.
Kani ka hukum toh kawa pynmih haka 7 tarik uni u bnai.
