Neidaw wa em kiwa yoh COVID-19 wei da em leh kiwa em hei maa wow yoh ya uni u khñiang ha Dong Lumrymmu, Mynso–A, kamtæ u District Magistrate, West Jaiñtia Hills District da pynbna u ya kani ka thaw kam ka Micro Containment Area nadooh myntu ka 8 tarik.
Ka hukum da khang ko ya kiwon kiwon ki bru wow psiah ki chapoh kani ka Containment Area wei kiwa em hapoh kani ka thaw toh u neh bait ki hapoh yung.
Da khang wow pynman ya kiwon kiwon ki yalang paidbah, ki khayi pateiñ wei waroh ki dukan wa ki yung krehkaam sorkar wa ki yong ki bru samen u man ki kiwa khang chisyndon.
Ki kari wa wan na baar kiwa lai luti na kani ka thaw ym toh u sangeh ki hapoh kani ka Containment Area.
U Incident Commander u man u kam u Supervising Officer kani ka thaw wa da pynman Containment Area.
Kani ka hukum ym em khang ko ya ki wakreh ha ki kaam sumaar sukhær, ki wakreh u Deputy Commissioner, West Jaiñtia Hills District, Jowai wa kiwi ki heh sorkar wa kiwa kreh sorkar ha ki kaam wym hoi u dam (Essential Services), ki laad pathai khubor wa kiwa li booh ya ki tadong LPG.
Kiwon kiwon kiwa leh pyrchah ya ka hukum daw chah pynchitom ki katkam ka aiñ Disaster Management Act, 2005 waka IPC.
