Neidaw wa em 3 ngut kiwa yoh COVID-19 ha ka chnong Guresimram wa em haka thaaiñ Dainadubi ha North Garo Hills, neiliang ki bor District da pynbna ya kani ka chnong kam ka Containment Zone le sngi nadooh ka 10 tarik uni u bnai hadooh ka 12 tarik uni hi u bnai yow ye u leh yei booddien ya kiwa em hei maa wow yoh ya uni u khñiang kamjooh yow leh yaka Medical Screening ya waroh kiwa chong chnong.
Ha kini ki sngi wa pynman Containment Area ym chah ya kiwa chong chnong wow mih ki cha baar ka chnong lait na ki pulit wa ki wakreh ka chnat i chait i khiah, ki Magistrate wa kiwi ki wakreh sorkar kiwa leh yei kaam yong ki.
Da kyrpaad leh ya kiwa chong chnong wow ya krehlang ki heipor wa leh yaka Medical Screening yow lait u pynboon sngi wa pynman Containment Area ya kani ka chnong.
Ha South Garo Hills District won, u DC da pyntip u wa lada em kiwon kiwon kiwa lai cha i dukan dai that u Nando Saha wa em ha yaw Baghmara uwa na Malikona wow lai mih ki cha ka yung krehkaam u DMHO lane cha ka Civil Hospital, Baghmara, neidaw wa da em uwi u bru wa yoh COVID-19 na ini i dukan dai that.
