Neiliang u CMD ka MeECL da pyntip u wa da pyndam yei pyndooh bordiñ namo ka Load Shedding nadooh ka 01-05-21 iwa ym toh iwa pura. Tangwa dang em hi i thut kiwa dang hap wow pynbait.
Da ong u wa hanla hiar hi u slap, ki kor pynmih bordiñ ka jylla da ye ki wow pynmih 60MW na ka 350MW kawa ye ki u pynmih. Wei da yooluti wa ha u Naiynru wa Naiynñiaw daw ye wow pynmih bordiñ kamwa da booh.
Kawi ka Unit pynmih bordiñ ka OTPC Palatana, Tripura dang pynchna hi ya ka hadooh kattæ wei ym pu ye ko wow pynmih bordiñ. Ki kor ka NEEPCO leh dang duna i pynmih bordiñ ki neidaw wa duna u slap. Kamtæ na kini ki daw da duna i ye wow pynmih bordiñ iwa 60-80MW. Na kini ki daw, ini wa dep da hap wow paan bordiñ na kiwi kiwa pynmih bordiñ Independent Power Producers (IPPs) kiwa em hapoh ka ri yow ye u pyndap yei emkaam bordiñ.
Neiliang u CMD da ong u wa ha kini ki por wa chitom, i kamram toh wow pyntikna wa ym dooh bordiñ ki Hospital, ki thaw wa booh ya i dawai tika, ki thaw pynmih Oxygen, kiwa yaleh ya ki Online Exam, ki wakreh na yung kamjooh leh ya ki paidbah waroh khamtam kiwa em ha Garo Hills kiwa da hap maad yei chit katni.
Kamtæ da sñiawkmen u wow pynbna wa ka MeECL u pynbiang bordiñ ko waroh 24 kynta ha waroh kawi ka jylla wei da pyndam yei pyndooh bordiñ chisyndon nadooh myntu ka sngi.
