U Montri wa pait ya ka chnat Bordiñ ha ka jylla, u James PK Sangma da ong u wa da sñiaw danda wa em kiwa dang pyrchah ya ka Dam ha Umngot, neibhah hei yong sakhiat ka sorkar ym em thmu ko wow e cha ki Company lane wow chna ya katai ka Dam, wei ka sorkar da dep ko leh wow pyndam ya ka soskular Memorandum of Understanding (MoU) wa yatoh wa ka Umngot Hydro Power Project, wei da pynsñiaw u leh yei lyngngoh wa mih kam itæ i tieñ na ki paidbah.
Kam wow kdaw heini wa ka Joint Action Committee da pteiñ ko wow pynsñiaw yei pyrchah ya i thmu yong ka sorkar wow Dam ya ka wah Umngot, wei dang ha ka tayaw wa da dep leh ka JAC da yachem ko wa u Symbood Montri Rangbah, u Prestone Tynsong wow pynsñiaw yei pyrchah.
Hawa klam wa ki kattu katni kiwa thoh khubor ynne ka sngi, u James da ong u wa lada ka sorkar ka thmu ko wow lai chakhmat wow chna ya katai ka Dam ha wah Umngot, daw pyntikna wa daw ya syllok bha wei wow paan yumut leh na waroh kiwa embynta, wa kynthup ya waroh kiwa chong chnong neidaw wa sñiaw tieñ kiwa chong chnong wei em leh kiwa chong yurim neibhah wa ye ki u chah ktah, wei da ong u leh wa ya kam kini manda wan i por daw ye u yaklam.
U Montri da ong u wa man ko iwa lyngngoh wa ileh ki paidbah ki booh sah ki yei sñiawtieñ hadooh katni hawa ka sorkar ym em ko yei thmu wow lai chakhmat. Da ong chooh chooh u wa i tieñ ki paidbah ye u man wa ka sorkar em ko i thmu wow pynkhlan chooh chooh yei pynmih bordiñ ha ka jylla, deiwa pynrap wa ini ym mut wa daw ye wow leh du deiwa Dam ya ka wah Umngot, tangwa em chiboon kiwi ki kaam (Project) kiwa ka sorkar da pynkhreh ko wa kynthup lyngba ka Solar Energy.
