U Montri Rangbah ka jylla, u Conrad Sangma hawa pynche yei sahkut i kreh yaka Iawmusiang Market Complex hadien wa nadooh u Thohlakhmi (Feb) 2020 da dep chim yaka rai wow lai chakhmat wow chna ya kani ka yaaw daka poisa ka sorkar jylla hi kat wym pu yoh yaka poisa ka wym pu pynlait naka sorkar pyrdi kawa T. 12 klur hapoh ka NLCPR.
Da ong u wa hadien wa chim ya kani ka rai da pynlait lut ya waroh ki Bill wa dang sah yong u Contractor. Wei hadien wa pynlait ka Bill u Contractor, da yooluti wow kreh biang u tangwa na ki daw wymtip wot hapyrdi da kynjoh ktien wei phah kot cha oo, ym jubab u iwa pynyoo lakam wym kwah de u wow kreh ya ini i kaam.
Hadien wa da ya chong pyrkhat wa u MLA deilang wa kiwi, da chim yei rai wow pyndam noh ya uni u Contractor yow khut Tender thymme wei mar ya khut Tender da kawi, uni u Contractor da ujor mukoduma u ha High Court wei da sahteiñ noh i kaam heiwa ym ye de u lai chadien wei ym ye de wow lai chakhmat wow khut Tender wei ini da sahkut i kamni da ki bnai.
Katni deiwa chimkhia u MLA ka Jowai, da em i ya sñiawthooh wa uni u Contractor wei da pyndam noh u yaka mukotduma wei ym kreh de u ya ini i kreh wei wow chah u khut Tender thymme yow sdang biang i kreh yaka Iawmusiang.
Heijooh i por da kdaw u wa heipor wa chimkti ka sorkar da boon ki kreh wa sahteiñ wa sdang ki sorkar warim tangwa nei chimkhia kani ka sorkar da ye wow pyndep ya kiwa boon ki kreh wei du kani ka sorkar wa ye u pyndep ya ki kreh nadooh ka Assembly, ka Taj Vivanta, ka Ganol Project wa kiwi kiwi.
Heiyatoh waka Iawmusiang da ong u wa ym ye u leh ini wadep neidaw wa em ka mukotduma, i wym bien u Contractor u ya krehlang iwa da pynkyllaiñ bha yei kaam najrong wa da sahkut ini i kaam da boon boon snem wei mar ya sdang ka sorkar wow tba yeini i kaam da mih lut kini kiwa boon ki jait wei da poi chadooh ka High Court.
Kamtæ da yooluti u wa katni deiwa mynjur u Contractor wym pynthut de u daw yoh noh u khut Tender thymme wei wow pyndep noh ya ini i kreh.
Puræ leh: Wa e mukotduma u Contractor tæ sah i kreh ya ka Iawmusiang: Wailadmiki Shylla
