Ynne ka sngi u Deputy Commissioner ka West Jaiñtia Hills u Garod LNS Dykes da yachem u wa ki waheh na ka chnong Dongmihsngi Jowai hadien wa da rai wow pynman Containment Area ya ka nadooh ynne i step synyaaw.
Da pyntip u wa hadien wa kyrpaad ka COVID Management Committee ka Dongmihsngi wei manda yaklam wa ki heh ka chnat i chait i khiah da chim noh ya ka rai wow pyndam noh ya ka Containment ha kani ka chnong chisyndon.
Da ong u wa katkam wa man katni, em 2 ngut kiwa man Positive namo kiwa chah ktah ha uni u khñiang.
Chooh chooh da ong u wa ha Dongmihsngi ki nongmuna (Sample) wa da chim em ki 13 tylli heiwa 11 ngut ym em chah ktah ki ha uni u khñiang.
Da pyntip u leh wa ka Village COVID Management Committee da bahkhlieh ko heiyatoh wow pyntikna wa ki 11 ngut kiwa ym em chah ktah ha u COVID-19 u chong kset (Home Isolation) ki hadooh wa da kut i por wa da booh.
