Ka Meghalaya Industrial Development Corporation Ltd (MIDC) da pyntip ko neidaw wa mih boon kiwa khñium wei kiwa pyrchah kamjooh i klam wym yahaap nia yei thmu wow chim ya iwi i thaw wa em ha ka thaaiñ Umsiang–Mawkdoh ka Ri-Bhoi District, neiliang ka MIDC da chim rai ko wow pyndam noh yeini.
U Chairman ka MIDC, u James Sangma da pynche u wa i jied yeini i thaw toh yow booh ya ka Industrial Estate wei ini i thaw toh iwa em hajan ka Electronic City ka Assam kawa dang chna kattæ wei da sñiaw wa kani toh ka laad wow booh ki karkhana kiwa man katkam ka juk kawa katni kiwa man kam ki Green & White Category Industry ki wym ktah ya ka rymaw deiwa pyrkhat katkam i long i man ki soodong sookun ka Meghalaya. Wei deiwa wanrah kini daw man ko ka laad yoh kreh ya kiwa chong chnong wa em ha kani ka thaaiñ wei u yarap ko leh wow pynmih poisa ya ka sorkar lyngba ki karkhana.
Ka MIDC da pynmih ko ya ka Expression of Interest (EOI) ha ka 07-03-25 deiwa pynbna ha ki kot khubor wei da em 6 ngut kiwa da wan chakhmat.
“Tangwa hadien ini da yoh ka MIDC boon tylli ki RTI na kiwa boon ki seiñ wei da lai ki chakhmat wow yahbakla ya kiwa boon deiwa ong wa yeini i thaw dadep wow chimkti hanla ympu em chimkti yei thaw. Da mih leh ki khubor wa da ong wa da pynlut Rs. 100 klur yow thied yeini i thaw kawa man ka khubor wa bakla neibhah ka mang tangka wa da mynjur toh hapoh 5% yeini wa da mih khubor,” da ong u James.
Chooh chooh da ong u wa ka MIDC da yoh ko boon tylli ki chithi na kiwa boon ki seiñ yow pyrchah ya kani Industrial Estate ha kani ka thaw, kamtæ da sñiaw wa bha wow pyndam noh u chimkti ya kani ka thaw lada ym ye wow pynemkaam ka kam ka Industrial Estate.
Da ong leh wa ka MIDC toh kawa da rai skem wow wanrah ya ka roi ka paar kawa khlem da noh chiliang yow pynku ya ka Meghalaya. Wei ya kani ka Industrial Estate ym lai de ka chakhmat wei daw thooh laad da kiwi kiwa man katkam i thmu wa jngai ka jylla heiyatoh wa ki karkhana.
Discussion about this post