Ynne ka sngi Musiang kawa man ka sngi wa le yong ka lehniam Behdieñkhlam ka Raij Jowai, dang step da pynyieñ ya ki Dieñkhlam ka Bon ha yong Rngad Wah, ka Doh ha Yung Langdoh iwa pynbood ya ki Dieñkhlam khian ha man la ki thyndai yung ki khon ki Kmai Raij wei hadien ini ki Khon Raij (Chiliangraij) da mih ki wow lithooh ya ka Symbood Khnong na kjat u Loom Soo Yung wow pynyieñ ya ka ha Khliehchnong.
Heipor chiteiñ sngi won ki Kmai Raij da yachem lang ki ha Myngkoi Pyrdi (Iongpiah) wow pynkhreh u lithooh ya ki Dieñkhlam heiwa da em leh ka yalang wa tbian wei manda kut kani ka yalang da mih ki cha Iawmusiang wow rah ya ki Dieñkhlam heiwa da chaad leh ha waroh ki thaw ka Raij kam ha Madan Biar, ha Madan Datlawakor, ha Madan Siat-thong wa kiwi kiwi ki thaw.
Hadien wa da pynpoi ya ki Dieñkhlam ha Madansiat-thong, ki Khon Raij da wanrah ki ya ka Khnong Blai na Loom Soo Yung yow rah ya ka cha Madan Poh-Sawiar.
Manda poi ha Madan Poh-Sawiar u Dolloi da e u yei kyntien ngoohblai ha ka Khnong Blai wei da ekti u yei pyrnah Khnong Blai ha u Kñi ka kur Nikhla wow e u i ngooh i dem wa i suit i choor ha ka Khnong Blai yow e ngooh ya ki Blai ki Syiem wei manda dep neini, ki Kmai Raij da rah ki jar jiar ki Dieñkhlam cha ki chnong yong ki wow pynyieñ ya ki.
Ki Khon Raij won da rah ki ya ka Khnong Blai wow pynpoi ya ka ha Madan Moosyiem, wa em haphrang ka Yungwalieh ka Chilliangraij heiwa u Pator da e u ya i pyrnah ha u Kñi ka Kur Nikhla wow pyndep u ya ngooh i dem wa i suit i choor.
Ynne ka sngi ka lehniam Behdieñkhlam da man ko kawa lai bait lai ryntih wei ka chongchit heiwa da yaleh wow bood katkam ki kyndon wa da pynkhreh ka Seiñraij Jowai khamtam kam heini i por wow khang nei poor ka khlam COVID-19.
