Ynne ka sngi ka 21 tarik kamwa da leh ha kylleiñ ka pyrthai wa ka ri, ha Jowai leh ki khon wa ngait niam Muslim da pyndep ki ya ka Eid Ul-Adha ka lehniam kawa jooh pynman man la u snem.
Kani ka lehniam da pyndep ya ka kam ka dak wow burom ya u Abraham (Ibrahim) uwa bien wow kñia ya u khon yong oo, u Isaac (Ishmael) kam ka dak wow bood ya ka hukum u Blai tangwa chwa wow kñia ya u khon u neiliang u Blai da e u da ka langbrot wow kñia.
Ha Jowai, ynne ya ka lehniam da pyndep ya i ngoohblai næ ka Namaz ha Masjid kawa em ha Chahtngit, Iawmusiang ya kawa da yahkhmat da u Imam Mohammad Shamshad Quereshi.
Neiliang u Imam da ong u wa neidaw wei deiwa bood ya ki kyndon yada na ka khlam da chah wow wan chimbynta du 4-5 ngut donhi.
Kiwi won kiwa ym yoh wow lai chimbynta ha ka Namaz da pyndep ki ya i ngoohblai pyn hapoh i yung i sem yong ki hi wei da pynbood sa i baam ya ki baam wa da pynkhreh kyrpang neibynta kani ka sngi.
