Ynne ka sngi ka 14 tarik kamwa da leh ha kylleiñ ka pyrthai, wa ka ri, ha Jowai leh ki bru wa ngait ka niam Islam da pyndep ki ya ka Eid Ul-Fitr ka lehniam kawa jooh pynman man-u-snem.
Kani ka lehniam da pyndep hadien ka Ramadan kawa mut kiwa man kam ki Muslim da chah thngan ki kamwa chi bnai ma-ka-sngi nadooh i step hadooh i janmiet.
Ya ka lehniam da pyndep kam ka dak wow yabha yamiat biang hapyrdi uwi wa uwi wei ymtoh u man ki kiwa yachoon wei wow em i burom markylliang.
Neidaw wa em ka khlam COVID-19, ynne i step ha Jowai da pyndep ya i ngoohblai næ ka Namaz ha Masjid kawa em ha Chahtngit wa yahkhmat da u Imam næ u heh niam ki Muslim ha Jowai, u Sahid Ahmed Choudhuary heiwa da puræ u ya i bynta na ka kotniam Quran.
Ha ini i step heipor wa pynman ya i ngoohblai da em du kamwa 4-5 ngut kiwa chimbynta neidaw wa em ka khlam COVID-19 wei wow bood ya ki kyndon ka sorkar.
Kiwi won kiwa ym yoh wow lai chimbynta ha ka Namaz da pyndep ki ya i ngoohblai pyn hapoh i yung i sem yong ki hi wei da pynbood sa i baam ya ki baam wa da pynkhreh kyrpang neibynta kani ka sngi.
